Saturday, July 23, 2016

ယာဂု နဲ့ ထမနဲ (သို့မဟုတ်) ပြည်ထောင်စုငြိမ်းချမ်းရေးညီလာခံ နဲ့ ၂၁ ရာစု ပင်လုံညီလာခံ



တဖြည်းဖြည်းနဲ့ ပုံ ပေါ်လာပါပြီ။
“၂၁ ရာစုပင်လုံညီလာခံကို (NCA) စာချုပ်အပေါ် အခြေခံပြီးလုပ်သွားမယ်”
“ ပြည်ထောင်စုငြိမ်းချမ်းရေးညီလာခံနဲ့ ၂၁ ရာစုပင်လုံညီလာခံကို တစ်ခုစီဖြစ်မှာလားလို့မေးကြပါတယ်၊ တစ်ခုတည်းပါ ၊ နာမည်တစ်ခုတည်းမဟုတ်ဘဲ နာမည်နှစ်ခုသုံးတယ်ဆိုတာက ပြည်ထောင်စုငြိမ်းချမ်းရေးညီလာခံဆိုတာကလည်း အင်မ တန်မှတင့်တယ်ပြီးအများကနှစ်သက်တဲ့ နာမည်တစ်ခုဖြစ်သလို ၂၁ရာစုပင်လုံဆိုတာကလည်းအများနှစ်သက်တဲ့ဟာဖြစ် ပါတယ်။ နှစ်ခုစလုံးက အတူတူပါပဲ” တဲ့။
သတိပြုမိတာလေးဖြတ်ရေးပါရစေ ( Burma/ Myanmar ) ကိစ္စမှာ လည်း အဆင်ပြေသလိုသုံးကြပါလို့ ပြောခဲ့တယ်။
“၂၁ ရာစုပင်လုံ” ဆိုတာက မူလအစက (ZNC) စတင်ခဲ့တဲ့ “ ဒုတိယပင်လုံ ” ပဲ။ အဲဒါကို “၂၁ ရာစုပင်လုံ” ဆိုပြီး မွမ်းမံလိုက် ကြတာပါ။ ဒီမိုအတိုက်အခံတွေနဲ့တိုင်းရင်းသားတွေ ဘက်က brand name မဟုတ်လား။
“ပြည်ထောင်စုငြိမ်းချမ်းရေးညီလာခံ” ဆိုတာကတော့ ဦးသိန်းစိန်ကြံ့ဖွံ့အစိုးရရဲ့ ဆိုင်းဘုတ်ပဲ။ ဒီဆိုင်းဘုတ်ကို စစ်တပ်ဘက်က ဆက်လက်ကိုင်စွဲထားတာပဲ။ မတူလို့သာ နာမည်ကိုယ်စီရှိနေကြတာမဟုတ်လား။ နာမည်တစ်ခုတည်း သတ်မှတ်လို့ မရနိုင်ကြလို့သာ နာမည်နှစ်ခုအတူတူပဲလို့အသိအမှတ်ပြုထားကြတာမဟုတ်ဘူးလား။ နာမည်ကိစ္စမှာ နှစ်ဖက်အလျှော့အတင်းမလုပ်နိုင်ကြဘူးဆိုတာပေါ် လွင်ပါတယ်။ ကိုယ့်နာမည် ကိုယ်ဆုပ်ကိုင်ရေး အခြေခံပေါ်မှာ နာမည်နှစ်ခုစလုံးက အတူတူပဲလို့ဆိုပြီး “ကြားချ” ခဲ့ကြပုံပါပဲ။
“ဖက်ဒရယ်” အသုံးအနှုန်းမှာ နှစ်ဖက်ကွဲလွဲနေတယ်မဟုတ်လား။ ဦးသိန်းစိန်ကြံ့ဖွံ့အစိုးရနဲ့စစ်တပ်က လက်ရှိကိုင်စွဲထားတဲ့ အသုံး အနှုန်းက “ဖက်ဒရယ်စနစ်ကိုအခြေခံသည့် ပြည်ထောင်စုစနစ်” ဖြစ်ပြီး။ ဒီချုပ်ပါတီအစိုးရက ကိုင်စွဲပြောဆိုနေတဲ့ အသုံးအနှုန်းက “ စစ်မှန်တဲ့ဖက်ဒရယ်ဒီမိုကရေစီပြည်ထောင်စု ” ဖြစ်ပါတယ်။
ဖက်ဒရယ်နဲ့ပတ်သက်ပြီး “ကာချုပ်” က သူ့သဘောထားကို ဘယ်လိုပြောသလဲဆိုတော့
“ပြည်နယ်နှင့်တိုင်းအားလုံးကို ပေးထားသည့် လုပ်ပိုင်ခွင့်များမှာ ဖက်ဒရယ်စနစ်နည်းပါးပင်ဖြစ်ကြောင်း၊ ဖက်ဒရယ်ဟု မသုံးခြင်းသာ ဖြစ်ပြီးကျင့်သုံးသည့်ပုံစံမှာ ဖက်ဒရယ်ပုံစံဖြစ်ကြောင်း၊ အရေးကြီးဆုံးမှာ Tax Sharing ၊ Power Sharing၊ Resource Sharing သုံးခုကို မည်သို့မျှတအောင် ပေးမည်ဆိုသည့် အဖြေပင်ဖြစ်ကြောင်း ”
ဟူ၍ဖြစ်ပါတယ်။ [“အကောင်းဆုံးကတော့ ဂျာမနီပေါ့ဗျာ” လို့ ဆိုတဲ့ ခွန်ထွန်းဦး မှာ တော့ ပြောစရာတွေအများကြီးရှိမှာသေချာပါတယ်၊ (၁၉၄၇ အခြေခံဥပဒေ) တပြည်ထောင်စနစ်ကို “ပြည်ထောင်စု” လို့ အညာခံခဲ့ကြရဖူးပြီ၊ မြန်မာ့နည်းမြန်မာ့ဟန် “ဆိုရှယ်လိမ်ဝါဒ”ကို လည်း မြည်းစမ်းခဲ့ကြပြီးပြီ၊ နောက်တခါလာပြန်ပြီ “ဖက်ဒရယ် အတုအယောင်” ]
“ကာချုပ်” ရဲ့ ဖက်ဒရယ်သဘောထားကို ဒီချုပ်ပါတီအစိုးရက လက်ခံနိုင်ပါသလား။
ဒါဆို တစ်ခုမေးပါရစေ “ဖက်ဒရယ်” အသုံးအနှုန်း ကိစ္စမှာလည်း “ နှစ်ခုစလုံးက အတူတူပါပဲ” လို့ လုပ်အုံးမှာလား။
မြင်နေရတာကတော့ “ရွေးကောက်ပွဲအနိုင်ရသူနဲ့ စစ်တပ်ကိုင်ထားသူ” အကြားက အပေးအယူလုပ်နေမှုပါပဲ။ တနည်းအားဖြင့် “၂၅ ရာခိုင်နှုန်းနဲ့ ၇၅ ရာခိုင်နှုန်း” အပေးအယူလုပ်နေကြတာလို့ ယေဘုယျအားဖြင့်ပြောရင် ရမယ်ထင်ပါတယ်။
စိတ်ဝင်စားစရာကောင်းတာက “ရွေးကောက်ပွဲအနိုင်ရသူ” က တိုင်းပြည်အတွက်၊ ပြည်သူအတွက်၊ ငြိမ်းချမ်းရေးအတွက် ဘာ ပေးမလဲ။ “စစ်တပ်ကိုင်သူ”က ဘာပေးမလဲ ဆိုတဲ့ကိစ္စဖြစ်ပါတယ်။“ဘယ်သူက ဘာပေးမလဲ” ဆိုတာကို တိုင်းရင်းသားပြည်သူတွေက လေ့လာစောင့်ကြည့်နေပါတယ်။လောလောဆယ်သိနိုင်မြင်နိုင်တာကတော့ တစ်ခုထဲ ဒါပေမယ့် နာမည်နှစ်ခုသုံးတဲ့ “ပြည်ထောင်စုငြိမ်း ချမ်းရေးညီလာခံ” နဲ့ “၂၁ ရာစုပင်လုံညီလာခံ” ဆိုတာ ပါပဲ။ ဘယ်သူ့ဘက်ကမှ ကိုယ်ကိုင်စွဲထားတဲ့ နာမည်ကို အလျှော့မပေးနိုင်ဘူး ဆို တဲ့သဘောပေါ့။
“ ၇၅ရာခိုင်နှုန်း” ဘက်က (ရွေးကောက်ပွဲမှာ အနိုင်ရသူများဘက်က) ဘာပေးမလဲဆိုတာ သေချာမသိသေးပေမယ့်၊ “၂၅ ရာခိုင်နှုန်း”ဘက်က (စစ်တပ်ဘက်က) “ ကြမ်းခင်းဈေး” ကိုတော့ မေ ၁၃ ရက်နေ့မှာ “ကာချုပ်”နဲ့ စစ်ဗိုလ်ထိပ်သီးတစ်စုပြော စကားတွေ ထဲကနေ အလွယ်တကူ သိမြင်နိုင်ပါတယ်။
တိုင်းရင်းသားလက်နက်ကိုင်အဖွဲ့များနဲ့ပတ်သက်ပြီး စစ်တပ်ဘက်က မလျှော့တမ်းစွဲကိုင်ထားတဲ့မူက “ကာချုပ်ရဲ့ငြိမ်းမူ၆ရပ်” ဖြစ်ပြီး၊ လက်တွေ့လုပ်ငန်းပိုင်းမှာတော့ လက်နက်ကိုင် အဖွဲ့အားလုံး (NCA) စာချုပ်မှာ ပါဝင်လက်မှတ်ထိုးရမယ်။ လက်နက်ချရမယ် ဆို တာတွေပဲဖြစ်ပါတယ်။ အပြောအဆိုတွေကလည်း မောက်မာရင့်သီးလှတယ်။
“ ပြည်ထောင်စုငြိမ်းချမ်းရေးညီလာခံလုပ်တဲ့အခါကျရင် သူတို့ (တိုင်းရင်းသားလက်နက်ကိုင်အဖွဲ့များ) လိုချင်တဲ့ အာမခံချက် ကျွန်တော်တို့ပေးနိုင်အောင်ကြိုးစားရမှာပေါ့၊ သို့သော်လည်း သူတို့လိုချင်တဲ့ဟာကလည်း ဒီဥပဒေပြဋ္ဌာန်းချက်တွေနဲ့ ကိုက်ညီဖို့လည်း လို တာပေါ့” တဲ့။
(NCA)မှာလက်မှတ်ထိုးပြီးအဖွဲ့ ၈ ဖွဲ့ရှိပြီ၊ လက်မှတ်ထိုးဖို့ ကျန်နေတဲ့ ၇ ဖွဲ့ ဆက်လက်ပြီးလက်မှတ်ထိုးရမယ်။ လက်နက်စွန့် ပေးရမယ် (“လက်နက်ချရမယ်” လို့မပြောဘူး အားနာလို့ဆိုပဲ)၊ ဒါက ကျန်တဲ့ ၇ ဖွဲ့ကို ဦးတည်ပြီး ပြောတာပါ။
ကိုးကန့်(MNDAA) ၊ (TNLA)၊ (AA) တို့နဲ့ ပတ်သက်ရင် စစ်တပ်ရဲ့သဘောထားက တမျိုးဖြစ်တယ်။
“ကိုးကန့်(MNDAA)၊(TNLA)၊ (AA)တို့ကို ငြိမ်းချမ်းရေးဆွေးနွေးသည့်အထဲ ဖိတ်ခေါ်ရန်မသင့်ကြောင်း၊ ၄င်းတို့နှင့်ငြိမ်းချမ်းရေး မဆွေးနွေးနိုင်ကြောင်း၊ တကယ်တမ်းလုပ်ရမည်မှာ လက်နက်စွန့်ဖို့ပင်ဖြစ်ကြောင်း” တဲ့။
(KIA)၊ (NDAA)၊ (UWSA) တို့လည်း “၁၉၈၉ တုန်းက ငြိမ်းချမ်းရေးလက်မှတ်ထိုးပြီးသားဖြစ်စေ” (NCA) မှာပါဝင် လက်မှတ် ရေးထိုးရမယ်လို့ ဆိုပါတယ်။
စစ်တပ်ဘက်က“လက်နက်မချရင်/အမြစ်ပြတ်ချေမှုန်း”ဆိုတဲ့ အပြုတ်တိုက်ရေးပေါ်လစီကိုကိုင်စွဲထားအပေါ်မှာလက်တွေ့ကျင့် သုံးပုံကတော့ တသမတ်တည်းမဟုတ်ဘူး။ “လက်နက်ကိုင်အင်အား ဘယ်လောက်ရှိသလဲ” ဆိုတဲ့ အပေါ်မှာ မူတည်ပြီး သဘောထားပုံ က အမျိုးမျိုးဖြစ်တယ်။ အခြေခံအားဖြင့် လက်တွေ့သဘောထားပုံ သုံးမျိုးကို တွေ့နိုင်တယ်။
၁။ အင်အားများရင် သဘောထားပုံက တမျိုးဖြစ်တယ်၊ ( အရှေ့မြောက်ဒေသက အင်အားစုတွေအပေါ်သဘောထား)
၂။ သူတို့ဂွင်ထဲမှာ ကျုံးသွင်းထားနိုင်ပြီဆိုရင် သဘောထားပုံက တမျိုးဖြစ်ပါတယ် ( KNU နဲ့ RCSS အပေါ်သဘောထား)
၃။ အင်အားမရှိရင်တော့ သဘောထားပုံက တမျိုးဖြစ်ပါတယ်၊(CNF/PNLO/ABSDF/ALP တို့အပေါ်သဘောထား)
(ဘယ်လိုပြောသလဲဆိုတော့ “ တကယ်လည်း သူတို့ဘာမှလည်းမရှိပါဘူး၊ ပြဿနာလည်းမရှိပါဘူး” — တဲ့)
“၂၁ ရာစုပင်လုံညီလာခံ” ခေါ်ယူရေးကိစ္စဟာ သမ္မတဦးထင်ကျော်အစိုးရအတွက် အင်မတန်ကြီးမားတဲ့ စိန်ခေါ်မှု တစ်ခုဖြစ် တယ်လို့ မြင်ပါတယ်။ စွန့်စားရမယ့်အလုပ်၊ ပိုင်းဖြတ်မှုကြီးကြီးနဲ့လုပ်ရမယ့် အလုပ်၊ နောက်ပြန်ဆုတ်လို့လည်း မဖြစ်တဲ့အလုပ်လို့ မြင်ပါ တယ်။
ဦးထင်ကျော်အစိုးရလျှောက်မယ့် လမ်းက ရိုးရိုးစင်းစင်းပါပဲ။ “၂၁ရာစု ပင်လုံညီလာခံ” မှာ ဆွေးနွေးညှိနှိုင်းပြီး သဘောတူရရှိ လာတဲ့ ဆုံးဖြတ်ချက်တွေကို ပြည်ထောင်စုလွှတ်တော်မှာတင်ပြပြီးအတည်ပြုတဲ့လမ်းပါ။ ရိုးစင်းတဲ့လမ်းကို လျှောက်လှမ်းမှာ ဖြစ်ပေမယ့် ဒီလမ်းပေါ်မှာ ကြီးမားတဲ့ အခက်အခဲတွေနဲ့ မရှောင်မလွှဲနိုင်ဘဲ ထိပ်တိုက်ရင်ဆိုင်ရစရာရှိနေပါတယ်။
အဓိကပြဿနာက ကာချုပ်နဲ့စစ်ဗိုလ်ချုပ်တစ်စု အသေကိုင်စွဲထားတဲ့ “ငြိမ်းမူ ၆ ရပ်” နဲ့ ရင့်သီးမောက်မာတဲ့ သဘောထား ရပ် တည်ချက်တွေပဲဖြစ်ပါတယ်။ စစ်တပ်က ဒီမူ၊ ဒီသဘောထား၊ ဒီပေါ်လစီတွေ ကိုင်စွဲထားနေသမျှ ညီလာခံကို ဘယ်သူပဲဦးဆောင် ဦး ဆောင်၊ဘယ်လိုနာမည်ပဲပေးပေး ပြီးပြည့်စုံတဲ့ပြေလည်မှုတော့မရရှိနိုင်ပါဘူး။ (ပေးသလောက် ယူသွားမယ့် သူတွေလည်း ရှိနိုင်ပါတယ်)
စစ်တပ်အတွက် ချေမှုန်းရေးသတ်ကွင်းပြင်ပေးသလို/ ကျုံးသွင်းပေးသလို ဖြစ်သွားပဲ စိုးရိမ်နေမိပါတယ်။
( Burma/ Myanmar ) ကိစ္စမှာလည်း အဆင်ပြေသလိုသုံးကြပါ
“ ပြည်ထောင်စုငြိမ်းချမ်းရေးညီလာခံ နဲ့ ၂၁ ရာစုပင်လုံညီလာခံ” နှစ်ခုစလုံးက အတူတူပါပဲ။
“ဒီချုပ်ပါတီအစိုးရ” နဲ့ “ စစ်တပ် ” အတူတူပါပဲလို့ ကောက်ချက်ချရမယ့်အချိန်ရောက်လာအုံးမှာလား
ညွန်း –
မြဝတီသတင်းစာ – (မေ ၁၅/ မေ ၁၇ ၊ ၂၀၁၆ )
မြန်မာ့အလင်းသတင်းစာ (၂၈ မေ ၂၀၁၆)


 (မိုးမခ) မေ ၂၉ ၊ ၂၀၁၆





0 comments: