Friday, April 4, 2014

လာဘ်ပေးတာသိရင် အရေးယူမယ် ဟုတ်စ

 
လာဘ်ပေးတာသိရင် အရေးယူမယ် ဟုတ်စ လာဘ်ပေးတယ်ဆိုတာ သူများ မယားကြာခိုတာနဲ့ အတူတူပဲ။ လူမသိအောင် လုပ်တဲ့ကိစ္စ။ အဲဒါကို တိတိကျကျ သိရင်လာပြောပါ။ အရေးယူမယ်ဆိုပြီး ၀န်ကြီး တစ်ပါးက ဂျာနယ်ထဲကနေ ပြောတယ်။ တိတိကျကျ သိရအောင်က လာဘ်ပေးပြီးရင် ငွေလက်ခံ ရရှိကြောင်း လက်မှတ်ထိုးခိုင်းလို့ရတဲ့ ကိစ္စမှ မဟုတ်တာ။ ပေးရတဲ့ သူကလည်း အပြင်မှာသာ ပြောတာ၊ တရားရုံးမှာ သက်သေ ဘယ်ထွက်ပါ့မလဲ။ ပြီးတော့ ပေးလိုက်ပြီ ဆိုတာနဲ့ ပြန်ရတဲ့ အခွင့်အရေးက ပေးရတာထက် ဆယ်ဆလောက် မြတ်နေတာလေ။ ဘယ်သူက ကိုယ့်စီးပွား အပျက်ခံပြီး တရားဝင် ပြောမှာလဲ။ ဒါပေသိ လူဆိုတာ အပေါင်းနဲ့ အသင်းနဲ့ဗျ။ ဒီတော့ အရင်း နှီးဆုံး လူကိုပြော၊ အဲဒီလူက တစ်ဆင့်သူနဲ့ ရင်းနှီးတဲ့ သူကို ထပ်ပြောရင်း ဘယ်သူ့ကို ဘယ်လောက် ပေးရတယ် ဆိုတာတွေက အပြင်ကို ထွက်လာတာလေ။

ဒီတော့ အဲဒီဝန်ကြီးကို ပြန်မေးချင်တယ်။ မြန်မာနိုင်ငံရဲ့ အသက်သွေးကြော ဧရာဝတီကို ခုတ်ထစ် ပိုင်းဖြတ်ပြီး ရေကာတာတွေ ဆောက်ခဲ့ရင် မြန်မာနိုင်ငံက ထွက်တဲ့ လျှပ်စစ်ရဲ့ ၁၀ ရာခိုင်နှုန်းပဲ ပြန်ဝယ်လို့ ရမယ်။ ဒါကို လာဘ်မစားဘဲ ခွင့်ပြုခဲ့တယ်လို့ ၀န်ကြီး ယုံကြည်ပါသလား။

မြန်မာနိုင်ငံက ရေနံတွင်းတွေကို တစ်လောက ကုမ္ပဏီ တစ်ခုကို ပေးလိုက်တယ်။ တကယ် ထွက်တာက တစ်နေ့ကို တစ်တွင်းစည် ၁၅၀၀ကျော်၊ ပေးလိုက်တဲ့ စာချုပ်မှာ တစ်တွင်းကို ၅၇၀စည်။ အဲဒါရော လာဘ်မစားဘဲ ပေးလိုက်တယ်လို့ ယုံပါသလား။

ဝန်ကြီးကိုပဲ တည့်တည့် မေးလိုက်တော့မယ်။ မြန်မာနိုင်ငံ ရင်းနှီးမြှုပ်နှံမှု ကော်မရှင် ဥက္ကဋ္ဌ တာဝန် ဆယ့်တစ်လ ထမ်းဆောင်စဉ်မှာ ဘီယာနဲ့ အရက်ချက် စက်ရုံ(၇)ရုံ၊ စီးကရက် စက်ရုံ(၃)ရုံ ခွင့်ပြုပေးခဲ့တာ ကရော ရိုးရိုးသာသား ခွင့်ပြုခဲ့တာလား။ ရိုးရိုးသာသား လာဘ်မစားဘဲ ခွင့်ပြုတယ်ဆိုရင် တိုင်းပြည်အတွက် ဘယ်လို အကျိုးတွေ မြင်လို့ ခွင့်ပြုခဲ့တာလဲ။ ဘယ်လို စေတနာနဲ့ ခွင့်ပြုခဲ့တာလဲ ဖြေပေး စေချင်ပါတယ်။ ၀နကြီးရဲ့ မဲဆန္ဒနယ် ကျွန်းစုမြို့နယ်မှာ စာသင်ကျောင်းတွေနဲ့ ဆေးရုံဆေးခန်းတွေမှာ ၀န်ကြီးနာမည်နဲ့ လှူခဲ့တာတွေကရော ဘယ်ကရတဲ့ ငွေတွေပါလဲ။

ရန်ကုန် တိရိစ္ဆာန်ရုံကို မြို့ပြင် လှော်ကားကို ရွှေ့ဖို့လုပ်တာကရော ၀န်ကြီးရဲ့ အစီအမံတွေ ဟုတ်၊ မဟုတ် သိချင်ပါတယ်။ သဘာဝ ပတ်ဝန်းကျင် ထိန်းသိမ်းရေးနဲ့ သစ်တောရေးရာ ၀န်ကြီးဌာနက အဲဒီ အစီအမံဟာ ၀န်ြကီးဌာနက လုပ်တာမဟုတ်ဘဲ ၀န်ကြီးစတာပါလို့ ဂျာနယ်ကို တရားဝင် ဖြေထားပါတယ်။

အဲဒီတုန်းက ၀န်ကြီး အကြောင်း ပြခဲ့တာက ရန်ကုန်မှာ ကားတွေများပြီး လေထု ညစ်ညမ်းလာလို့ တိရိစ္ဆာန်တွေရဲ့ ကျန်းမာရေး ထိခိုက်တဲ့ အတွက် ရွှေ့ရတာပါလို့ ပြောခဲ့တယ်။ ဒီလိုဆိုရင် ရန်ကုန်မြို့ထဲမှာ နေတဲ့သူတွေက တိရိစ္ဆာန်တွေလောက်တောင် အလေးထား မခံရ တော့ဘူးလား။ တိရိစ္ဆာန်ရုံ မြို့ပြင် ရွှေ့ပြီးရင် အဲဒီ နေရာကို ဘယ်သူ့ကို ပေးဖို့များ စီစဉ်ခဲ့ပါသလဲ။

ဝန်ကြီးနဲ့ နီးစပ်တဲ့ စီးပွားရေးသမားတွေ ဆီက ထွက်လာတဲ့ စကားအရ စက်မှု(၁)က မြေနေရာတွေကို ၀န်ကြီးနဲ့ နီးစပ်သူတွေကို သူခိုးဈေးနဲ့ ပေးခဲ့ပါသတဲ့။ တခြား မကြည့်ပါနဲ့။ စစ်တောင်း စက္ကူစက်ကို ၀န်ကြီးက
ရွှေသံလွင် ကုမ္ပဏီကို ဘယ်ဈေးနဲ့ ပေးခဲ့တာလဲ ဆိုတာ ဂျာနယ် တစ်စောင်မှာ ငွေပမာဏနဲ့တကွ အတိအကျ ဖော်ပြထားပါတယ်။

ဒါတင်မက ရှုံးတယ်လို့ ကုမ္ပဏီက ပြောတဲ့အတွက် ဘယ်နှစ် ငွေပေးသွင်းခွင့် ကင်းလွတ် ခွင့်ပြုခဲ့တယ်ဆိုတာပါ ဖော်ပြပြီး ဖြစ်ပါတယ်။ အဲဒီစက်ရုံကိုပဲ နောက်တက်လာတဲ့ စက်မှုဝန်ကြီး လက်ထက်မှာ ငှားတော့ ၀န်ကြီးငှားခဲ့တဲ့ ဈေးထက် အဆများစွာ ပိုရခဲ့တာကို ၀န်ကြီး ဘယ်လို ဖြေရှင်း ချင်ပါသလဲ။ ၀န်ကြီးလက်ထက်မှာ ပေးခဲ့တဲ့ အင်းစိန်ဆပ်ပြာ စက်ရုံမြေနေရာကလည်း အပြင်မှာ
အသံသိပ်ထွက်ပါတယ်။ အဲဒီလိုပဲ ဒညင်းကုန်း အုတ်စက်ရုံ ငှားရမ်းတဲ့ ကိစ္စမှာ နောက်တက်လာတဲ့ ၀န်ကြီးက ဈေးနဲတယ်ဆိုပြီး ထပ်တောင်းတော့ ရထားတဲ့သူက အပြုံးမပျက် အတိုးပေးသွားခဲ့တာကရော။

ဝန်ကြီး အစိုးရ အမှုထမ်းသက် တစ်လျောက်လုံး လာဘ်မစားခဲ့ဘူး ဆိုရင် သတင်းစာ ရှင်းလင်းပွဲ ထလုပ်လိုက်ပါ။ မီဒီယာတွေက တစ်ခုချင်း မေးပါမယ်။ တစ်ခုတော့ ရှိတယ်နော်။

အရင် သတင်းစာ ရှင်းလင်းပွဲတွေကလို မပြီးခင် ထမပြန် ကြေး။ တစ်ခုတော့ အစ ဖော်ပေးလိုက်မယ်။ ဒီအစိုးရသစ် လက်ထက်မှာ လာဘ်ယူတဲ့ ကြမ်းခင်းဈေးက အလုပ်တစ်ခုကို ကျပ်သန်းတစ်ထောင်နဲ့ ညီမျှတဲ့ အမေရိကန် ဒေါ်လာ တစ်သန်း ဖြစ်တယ်ဆိုတာ အပြင်မှာ လူတိုင်းသိနေကြပါလေရဲ့။

မာဂျေ
( Tomorrow သတင်းဂျာနယ်အမှတ်(၆)ပါ သရော်စာ )

သတင်းရင်းမြစ် - Kyaw Swar Myint(FB)သတင်းစာမျက်နှာမှ
 
 

0 comments: