Thursday, February 27, 2014

၂၀၁၅ မတိုင်မီဖြေပါ ပြည်ခိုင်ဖြိုး

 ဓာတ်ပုံ- ဂျေမောင်မောင် (အမရပူရ)
မြန်မာနိုင်ငံ၏ အုပ်ချုပ်မှုမြို့တော်အဖြစ် သတ်မှတ်ထားသော နေပြည်တော်သို့ အမြန်လမ်းမကြီးမှတစ်ဆင့် လာရောက်ပါက ဦးစွာတွေ့ရှိရသော ကံ့ကော်ပန်းအ၀ိုင်းအနီးတွင် လှပခံ့ညားလှသည့် အဆောက်အအုံကြီး တစ်ခုက ဆီးကြိုနေမည်ဖြစ်သည်။

မြေဧကပေါင်းများစွာ ကျယ်ဝန်းသည့် မြေဧရိယာအတွင်း ခေတ်မီဒီဇိုင်းများဖြင့် ဆောက်လုပ် ပုံဖော်ထားသည့် အဆောက်အအုံကြီးမှာ မြန်မာနိုင်ငံတွင် အကြီးမားဆုံး ပါတီဌာနချုပ်ရုံး ဟူ၍ပင် ခေါ်ဆိုနိုင်မည့် ငွေကျပ်သန်းပေါင်းများစွာ အကုန်အကျခံတည်ဆောက်ထားသော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီပိုင် ဌာနချုပ်ရုံး အဆောက်အအုံကြီးပင်ဖြစ်သည်။

ထိုကဲ့သို့ ခမ်းနားလှသည့် အဆောက်အအုံကြီးကို တည်ဆောက်နိုင်သည့် ငွေကြေးပမာဏသာမက ထို့ထက်များပြားလှသည့် ငွေကြေး၊ အဆောက်အအုံ၊ လုပ်ငန်းများ ပိုင်ဆိုင်ထားသည့် ပါတီကြီး၏ ချမ်းသာ ကြွယ်ဝမှုများသည် မည်ကဲ့သို့ ရရှိလာပါသနည်းဟူသော မေးခွန်းမှာ ၂၀၁၅ ရွေးကောက်ပွဲ အကြိုကာလများတွင် ပြည်ခိုင်ဖြိုးအနေဖြင့် မဖြစ်မနေဖြေရမည့် ၂၀၁၀ ကပင် တင်ကျန်ခဲ့သည့် မေးခွန်းကြွေးဖြစ်သည်။

အသင်းပိုင် အဆောက်အအုံများ၊ ငွေကြေး၊ လုပ်ငန်းပိုင်ဆိုင်မှုများသည် ယခင်အစိုးရက ပြည်သူများ ပိုင်ဆိုင်သည့် လုပ်ငန်းငွေကြေး၊ ဘဏ္ဍာများကို လွှဲပြောင်းပေးခဲ့ခြင်းဖြစ်၍ ယခုလက်ရှိ ပါတီပိုင်ဖြစ်နေသော ဓနဥစ္စာများသည် ပြည်သူပိုင်များပင် ဖြစ်ကြောင်း နိုင်ငံရေးလေ့လာသူအချို့က ဝေဖန်ပြောကြားသည်။

ထိုအချက်ကို လွှတ်တော်အတွင်းရောက်ရှိနေသည့် ပြည်ခိုင်ဖြိုးပါတီ ထိပ်ပိုင်းခေါင်းဆောင်များအား မေးမြန်းသော်လည်း ပြန်လည်ရှင်းလင်းဖြေကြားခြင်းမရှိခဲ့ပေ။

မကြာမီနှစ်အတွင်း ကျင်းပပြုလုပ်တော့မည့် အထွေထွေရွေးကောက်ပွဲ၌ ပါဝင်ယှဉ်ပြိုင်ဦးမည့် ပြည်ခိုင်ဖြိုးပါတီအနေဖြင့် ပါတီပိုင်ဆိုင်မှုစာရင်းဇယားများနှင့် မည်ကဲ့သို့ရရှိလာသည်ကို ပွင့်လင်းမြင်သာစွာ ထုတ်ပြန်မှသာ ပြည်သူများ၏သံသယများကို ဖြေဖျောက်နိုင်ပြီး လာမည့်ရွေးကောက်ပွဲတွင် မဲဆန္ဒရှင်များ
အမြင်ရှင်းရှင်းဖြင့် မဲပေးနိုင်မည်ဖြစ်သည်။

အစိုးရရုံးဌာနများ နေပြည်တော်သို့ ပြောင်းရွှေ့ခဲ့သည့် ကာလမှာပင် အသင်းအဖြစ်တည်ရှိနေသည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးအသင်းမှ ယင်းတို့၏ဌာနချုပ်ကို နေပြည်တော်သို့ ပြောင်းရွှေ့ခဲ့သည်။

ပြည်ထောင်စုဝန်ကြီးဌာန ရုံးတစ်ရုံးထက်ပင် ပိုမိုခမ်းနားကြီးကျယ်သော အသင်းဌာနချုပ်ရုံး၏ ဆောက်လုပ်ကုန်ကျမှုစရိတ် မည်ရွေ့မည်မျှရှိခဲ့သည်ကို ထုတ်ပြန်ကြေညာခဲ့ခြင်းမရှိဘဲ အသင်းမှပါတီအဖြစ်ကူးပြောင်းချိန်တွင် အဆိုပါဌာနချုပ်ရုံးအပါအ၀င် အသင်းပိုင်လုပ်ငန်းများ၊ ငွေကြေးများ အားလုံးကို ပါတီမှလက်လွှဲရယူခဲ့သည်။

အငြင်းပွားစရာမဲရလဒ်များထွက်ပေါ်ခဲ့သည့် ၂၀၁၀ ရွေးကောက်ပွဲတွင် ပြည်ခိုင်ဖြိုးပါတီက နိုင်ငံရေးနယ်ပယ်တစ်ခုတည်းတွင်သာ အသာရခဲ့ခြင်းမဟုတ်ဘဲ။ စီးပွားရေးနယ်ပယ်တွင်လည်း အခြား နိုင်ငံရေးပါတီများထက် အသာရခဲ့သည်။

ထိုဘဏ္ဍာရေးအားသာချက်က နောင်လာမည့် ၂၀၁၅ ရွေးကောက်ပွဲတွင် ပြည်ခိုင်ဖြိုးအတွက် အားသာချက် တစ်ခုဖြစ်လာနိုင်ကြောင်း ၎င်းတို့ကပြောသည်။

မကြာသေးမီက နေထိုင်ရေးစိတ်မအေးနိုင်ဘဲ ပြေးစရာမြေမရှိဖြစ်နေသော သမီးကလေးကျေးရွာသူရွာသားများကို ပြည်ခိုင်ဖြိုးပါတီက နေစရာပေးမည်ဟု ကမ်းလှမ်းခဲ့သည်။

ကျောခင်းစရာမရှိတော့သည့် အိမ်ထောင်စု ၁၅၀ ကျော်မှ ရွာသူရွာသားများကမူ ရွေးချယ်စရာမရှိ။

“ကျွန်တော်တို့ကတော့ သူတို့စီမံတဲ့နေရာလိုက်နေမှာပါ”ဟု ရွာသားတစ်ဦးကဆိုသည်။

နိုင်ငံရေးသုံးသပ်သူများကမူ ၂၀၁၅ အတွက် ပြည်ခိုင်ဖြိုး၏ခြေလှမ်းများဖြစ်သည်ဟု သုံးသပ်သည်။

ပြည်ထောင်စုရွေးကောက်ပွဲကော်မရှင်ကလည်း ပါတီများ၏ ပိုင်ဆိုင်မှုကိုတင်ပြရန် ပြဋ္ဌာန်းထားခြင်းမရှိ၍ အခြားပါတီများနည်းတူ ပြည်ခိုင်ဖြိုး၏ ချမ်းသာကြွယ်ဝမှု မည်မျှရှိသည်ကိုမသိကြောင်း အကြောင်းပြန်သည်။

သို့သော်လည်း တပ်မတော်အစိုးရက ၂၀၁၀ ရွေးကောက်ပွဲတွင် အငြင်းပွားစရာကြိုတင်မဲများ၊ ပယ်ပဲများရှိခဲ့သည်ဟု စွပ်စွဲမှုများကြား ပြည်ခိုင်ဖြိုးပါတီအာဏာရရှိရေးကိုသာ ခွင့်ပြုခဲ့ခြင်းမဟုတ်ဘဲ အသင်းအဖြစ်ရှိနေစဉ်ကတည်းက ရရှိထားသည့် အဆောက်အအုံများ၊ စီးပွားရေးလုပ်ငန်းများကို လွှဲပြောင်းရယူခွင့်ပေးခဲ့သည်ဆိုသည့် စွပ်စွဲမှုများရှိခဲ့သည်။

ရွေးကောက်ပွဲမကျင်းပမီ ၂၂၇ ရက်တိတိအလို ၂၀၁၀ မတ်လ ၂၅ ရက်က တပ်မတော်အစိုးရ၏ ပုဂ္ဂလိကပိုင်ပြုလုပ်ရေးကော်မရှင်က အစည်းအဝေးတစ်ခုပြုလုပ်ခဲ့သည်။ ထိုအစည်းအဝေးက နိုင်ငံတစ်ဝန်းလုံးရှိ စွမ်းအင်ဝန်ကြီးဌာနလက်အောက်မှ နိုင်ငံပိုင်စက်သုံးဆီဆိုင် ၁၉ ဆိုင်ကို ပြည်ခိုင်ဖြိုးထံ အပြီးအပြတ်ရောင်းချရန် ဆုံးဖြတ်လိုက်ကြသည်။

ရန်ကုန်မြို့ရှိ အထင်ကရနေရာများဖြစ်သည့် မင်္ဂလာတောင်ညွန့်၊ ဗိုလ်တထောင်၊ စမ်းချောင်း၊ မရမ်းကုန်း၊ တောင်ဥက္ကလာ အပါအ၀င် နိုင်ငံတစ်ဝန်းလုံးရှိ စက်သုံးဆီဆိုင် ၁၉ ဆိုင်အတွက် ကျပ်ငွေ ၁၅၀၁ ဒသမ ၃၄၉ သန်းသာ ပေးချေခဲ့ရသည်။ ထိုစဉ်က ပြည်ခိုင်ဖြိုးသည် အသင်းအဖြစ်သာရှိနေဆဲဖြစ်ပြီး တပ်မတော်အစိုးရနှင့်နီးစပ်သည့် စီးပွားရေးလုပ်ငန်းရှင်ကြီးများနှင့်အတူ နိုင်ငံပိုင်ပစ္စည်းများဝေခြမ်းရေးအစီအစဉ်အတွက် မည်သူမျှစောဒကကျယ်ကျယ်လောင်လောင် မတက်ရဲခဲ့ကြ။

အစိုးရသစ်လက်ထက် ဝေဖန်မှုများစတင်မှ ပြည်ခိုင်ဖြိုးပါတီထိပ်ပိုင်းခေါင်းဆောင်များက လုပ်ထုံး လုပ်နည်းနှင့်အညီ ဥပဒေဘောင်အတွင်းက ဆောင်ရွက်ခဲ့ဖြစ်ကြောင်း တုံ့ပြန်ခဲ့သည်။

သို့သော်လည်း အဆိုပါဈေးနှုန်းဖြင့် မြေဈေးခေါင်ခိုက်နေသည့် မြန်မာနိုင်ငံတွင် ရတောင့်ရခဲအခွင့်အရေးဖြစ်ပြီး ထိုဆုံးဖြတ်ချက်ကို တစ်နှစ်နှင့်နှစ်ပတ်တိတိကြာမှ ပြည်သူကို တရားဝင်အသိပေးခဲ့သည်ဆိုသည်ကိုတော့ အာဏာပိုင်များရော၊ ပြည်ခိုင်ဖြိုးဘက်ကပါ ထုတ်ဖော်ပြောဆိုခြင်းမရှိခဲ့ပေ။

ရန်ကုန်မြို့တွင်းပြေးဆွဲနေသည့် ယာဉ်လိုင်းအချို့သည်လည်း ပြည်ခိုင်ဖြိုးပါတီက လုပ်ပိုင်ခွင့်ရခဲ့ပြီး မကြာမီကာလအတွင်းကမှ အမည်ပြောင်းလဲပြေးဆွဲခဲ့ခြင်းဖြစ်သည်။

နယ်မြို့ကြီးများတွင် ပြေးဆွဲနေသည့် အဝေးပြေးယာဉ်လိုင်းအချို့မှာလည်း ပါတီပိုင် ယာဉ်လိုင်းများပင် ဖြစ်သည်။

၂၀၁၀ ရွေးကောက်ပွဲမစမီ ၁၇ နှစ်ခန့်အလိုကတည်းက တပ်မတော်ထိပ်တန်းအရာရှိကြီးများနှင့် ဖွဲ့စည်းထားခဲ့ပြီး နိုင်ငံပိုင်အဆောက်အအုံများ၊ အားကစားကွင်းများ၊ အသုံးပြုခွင့်ရရှိခဲ့သည့် ပြည်ခိုင်ဖြိုးအသင်းသည် ပါတီအဖြစ်ပြောင်းလဲသွားသော်လည်း ထိုအခွင့်အရေး ဆက်လက် ရရှိနေဆဲဖြစ်ကြောင်း ဝေဖန်မှုများလည်းရှိသည်။

နိုင်ငံပိုင်နှင့် သာမန်ပြည်သူများရရှိရန် ခက်ခဲလှသည့်နေရာအချို့တွင် ပြည်ခိုင်ဖြိုးက အဆောက်အအုံအချို့ ဆောက်လုပ်ခွင့်ရခဲ့သည်။

အဆိုပါအဆောက်အအုံများအနက် အချို့သည် အခမဲ့ဆေးကုခန်းများ ဖြစ်သွားကြသည်။ ဝေဖန်မှုအချို့က ပြည်ခိုင်ဖြိုး၏ဆေးခန်းများသည် အမှန်တကယ်အလုပ်မဖြစ်ဘဲ ရန်ကုန်မြို့လယ်အပါအ၀င် အကွက်အကွင်း ကောင်းသည့်နေရာများတွင် မြေနေရာဦးရုံသက်သက်သာဖြစ်သည်ဟုပြောသည်။

ပြည်ခိုင်ဖြိုး၏ ဗဟိုကော်မတီဝင်တစ်ဦးဖြစ်သည့် အမျိုးသားလွှတ်တော်ကိုယ်စားလှယ်ဦးလှဆွေက အဆိုပါစွပ်စွဲချက်များသည် မဖြစ်ညစ်ကျယ်ပြောစကားများဟု တုံ့ပြန်ခဲ့သည်။

“ကြံ့ခိုင်ရေးက ရာချီတဲ့ဆေးခန်းတွေ ဒီနေ့ထိကုနေတယ်။ အလကားကုပေးနေတယ်”ဟု ပြည်ခိုင်ဖြိုး၏ “ဖြိုးစေတနာ”ဆေးခန်းများအကြောင်း ဦးလှဆွေကပြောသည်။

ထို့အပြင် မြေသိမ်းသည်ဟုဆိုလိုက်လျှင် ယခင်အစိုးရ၊ စစ်တပ်နှင့် ခရိုနီတို့ကိုသာ ပြေးမြင်ကြပေလိမ့်မည်။

လက်ရှိ တိုင်းပြည်ကို အုပ်ချုပ်နေသည့် အာဏာရပါတီဖြစ်သော ပြည်ခိုင်ဖြိုးပါတီ၏ ဗဟိုဌာနချုပ်ရုံးအပါအ၀င် ရန်ကုန်မြို့ သမိုင်းလမ်းဆုံရှိ ဖြိုးစေတနာဆေးခန်းမြေနေရာ တိုင်းဒေသကြီး၊ ပြည်နယ်၊ ခရိုင်၊ မြို့နယ်အဆင့်ဆင့်တွင် ခွင်ပြည့်ကွက်ကျ ဖွင့်လှစ်ထားသည့် ယခင်အသင်းရုံး၊ ယခုပါတီရုံးများ တည်ရှိနေသည့် မြေနေရာများသည် ယခင်က မည်သူပိုင်ဆိုင်ခဲ့သည့် မြေနေရာများဖြစ်ပါသနည်း။

အမှန်တကယ်ပင် မူလပိုင်ဆိုင်သူများထံမှ တန်ရာတန်ကြေးပေး၍ ၀ယ်ယူထားခဲ့ခြင်းဟုတ်ပါသလား။ ထိုမေးခွန်းကို စနစ်တကျ ၀ယ်ယူခဲ့ခြင်းမဖြစ်နိုင်ကြောင်း နိုင်ငံရေးပါတီအချို့မှ ပုဂ္ဂိုလ်အချို့ကပြောကြားသည်

ဖြိုးစေတနာဆေးကုခန်း မြေနေရာများအပါအ၀င် ပြည်ခိုင်ဖြိုးရရှိနေသည့် မြေနေရာများသည် အသင်းအဖြစ်တည်ရှိနေဆဲကာလအတွင်းက ရရှိထားသော မြေနေရာများဖြစ်သည်ဟု စွပ်စွဲမှုများအတွင်း ပါတီအဖြစ် အသွင်ပြောင်းချိန်တွင် တစ်စုံတစ်ရာဖြေရှင်းမှုများ ပြုလုပ်ရန်လိုအပ်ကြောင်း သုံးသပ်သူတို့ကပြောသည်။

၁၉၈၈ အရေးအခင်းအပြီး ဖွဲ့စည်းခဲ့သည့် တိုင်းရင်းသားစည်းလုံးညီညွတ်ရေးပါတီသည် ထိုအချိန်က အသွင်ပြောင်းစဉ် ပိုင်ဆိုင်မှုအခြေအနေကို ရှင်းလင်းတင်ပြခဲ့ရသည်ဟု တိုင်းရင်းသားစည်းလုံးညီညွတ်ရေးပါတီ၏ ရန်ကုန်အနောက်ပုိုင်းခရိုင်ဥက္ကဋ္ဌ ဦးခင်ဇော်ကပြောသည်။

“ကျွန်တော်တို့တုန်းကလည်း တိုင်တာတွေ၊ တောတာတွေရှိတယ်။ အဲဒီတော့ မြန်မာ့ဆိုရှယ်လစ် လမ်းစဉ်ပါတီကို ကူးပြောင်းတဲ့ဟာတွေ ရှင်းလင်းပြရတာပေါ့။ အခုတော့ အာဏာရ ပါတီပြည်ခိုင်ဖြိုးပေါ့။ ဒါပေမဲ့ သူတို့က ကျွန်တော်တို့ကို ရှင်းပြတာမျိုးမတွေ့ရဘူး”ဟု ဦးခင်ဇော်ကပြောသည်။

မြန်မာနိုင်ငံလွတ်လပ်ရေးရအောင် ဆောင်ကြဉ်းပေးခဲ့သည့် ဖဆပလပါတီအနေဖြင့် ၁၉၅၈ ခုနှစ်တွင် တပ်သို့အာဏာလွှဲပြောင်းခဲ့ရချိန်တွင် ပါတီပိုင်အဆောက်အအုံနှင့် အနည်းငယ်သောငွေကြေးများကိုပါ ပေးအပ်လိုက်ရသဖြင့် ပါတီနှစ်ခြမ်းကွဲသောအချိန်တွင် အမွေအနှစ်ဟူ၍ မကျန်ခဲ့သဖြင့် ဝေခြမ်းရန်၊ အမွေဆက်ခံရန်
မလိုတော့ကြောင်း ယင်းပါတီတွင် လုပ်ကိုင်ခဲ့သည့် ဒီမိုကရက်တစ်ပါတီ(မြန်မာ)ဥက္ကဋ္ဌ ဦးသုဝေက ၎င်း၏အတွေ့အကြုံကိုပြောပြသည်။

“ကြံ့ခိုင်ရေးအသင်းက အရင်အစိုးရ တည်ထောင်ခဲ့တဲ့အသင်းဖြစ်တဲ့အတွက် သူတို့ရဲ့ပိုင်ဆိုင်မှုအဆောက်အအုံတွေဟာ ပြည်သူပိုင်တွေဖြစ်တယ်။ အသင်းကိုဆက်ခံတဲ့ ပါတီကလည်း ဒါတွေကိုယူတယ်ဆိုတော့ ပြည်သူပိုင်ကို သူတို့ပိုင်လုပ်လိုက်တဲ့သဘောပဲ”ဟု ဦးသုဝေကဆိုသည်။

နိုင်ငံရေးပါတီများ မှတ်ပုံတင်ခြင်းဥပဒေတွင် နိုင်ငံတော်ပိုင်ငွေကြေး၊ မြေ၊ အိမ်၊ အဆောက်အအုံ၊ ယာဉ်၊ ပစ္စည်းတို့ကို တိုက်ရိုက်ဖြစ်စေ၊ သွယ်ဝိုက်သောနည်းဖြင့်ဖြစ်စေ ရယူသုံးစွဲခြင်းကို ကန့်သတ်ထားသည်။

သို့သော်လည်း ခြွင်းချက်အချို့ထည့်သွင်းထားပြီး ထိုခြွင်းချက်များက ပြည်ခိုင်ဖြိုးကို အထောက်အကူဖြစ်စေရန် ရည်ရွယ်သည်ဟု နိုင်ငံရေးသုံးသပ်သူတို့ကဆိုသည်။

နိုင်ငံရေးပါတီများရရှိထားသည့် ရန်ပုံငွေများ၊ စီးပွားရေးလုပ်ငန်းများမှ အမြတ်ငွေများကို ထင်သာမြင်သာချပြရန် လိုအပ်ကြောင်း အမျိုးသားလွှတ်တော်ကိုယ်စားလှယ် ဦးဖုန်းမြင့်အောင်ကပြောသည်

“အခုတော့ ဘယ်ကရလဲမမေးပါနဲ့။ ဘယ်လိုသုံးလဲမမေးပါနဲ့ဆိုတော့ အဲဒါပါတီမဟုတ်ဘူး။ ကုမ္ပဏီပဲဖြစ်လိမ့်မယ်”ဟု ဦးဖုန်းမြင့်အောင်ကပြောသည်

၂၀၁၅ ရွေးကောက်ပွဲသည် ပိုမိုအကြိတ်အနယ်ရှိလာမည့် အခြေအနေတွင်ရှိသောကြောင့် ပါတီများ၏ စီးပွားရေးအခြေအနေသည် ရွေးကောက်ပွဲကာလတွင် လွန်စွာအရေးပါလာမည်ဖြစ်ကြောင်း ၂၀၁၀ ရွေးကောက်ပွဲဝင် အမည်မဖော်လိုသူ တစ်သီးပုဂ္ဂလလွှတ်တော်ကိုယ်စားလှယ်လောင်းကပြောသည်။

“လက်ရှိသတ်မှတ်ချက်အရ တစ်ယောက်ငါးသိန်းဆိုရင်ပဲ နေရာတိုင်းဝင်ပြိုင်တဲ့ပါတီက သိန်း ၆၀၀ လောက်ကုန်မယ်။ ဒါတောင် ရွေးကောက်ပွဲကုန်ကျစရိတ်မပါသေးဘူး။ ရွေးကောက်ပွဲစရိတ်က သတ်မှတ်ထားသလို တစ်ယောက်သိန်း ၁၀၀ နှုန်းနဲ့သုံးရင်ပဲ သိန်းကို သိန်းဂဏန်းနဲ့ချီကုန်မယ်။ တော်ရုံပါတီက နေရာတိုင်းပြိုင်ဖို့ဆိုတာမဖြစ်နိုင်ဘူး”ဟု ၎င်းကပြောသည်။

ပါတီရန်ပုံငွေတောင့်တင်းရန် ကြိုးစားခြင်းမှာ နိုင်ငံတကာတွင် လုပ်ဆောင်လေ့ရှိသည့် ကိစ္စတစ်ခုသာဖြစ်ကြောင်း၊ ပြည်တွင်းပါတီများလည်း သူ့နည်းသူ့ဟန်ဖြင့် ရန်ပုံငွေတောင့်တင်းရန် ကြိုးပမ်းနေကြောင်း ပြည်ခိုင်ဖြိုး၏ ဗဟိုကော်မတီဝင်တစ်ဦးဖြစ်သူ ဦးလှဆွေကပြောသည်။

“နိုင်ငံတကာမှာလည်း ရန်ပုံငွေတောင့်အောင် ရှာကြတာပဲ။ အိုဘားမားလည်း ရှာတာပဲ။ ဟီလာရီကလင်တန်လည်း ရှာတာပဲ”ဟု ဦးလှဆွေကပြောသည်။

“ကြံ့ခိုင်ရေးအသင်းကပိုင်တဲ့ ပစ္စည်း၊ လုပ်ငန်း၊ အဆောက်အအုံငွေကြေးတွေဟာ အစိုးရကလွှဲပြောင်းပေးခဲ့တဲ့ ပြည်သူပိုင်ဖြစ်တယ်။ အဲဒါကို ပါတီပိုင်လုပ်ပစ်တာကတော့ မတရားဘူးလို့ထင်တယ်။ သိက္ခာရှိတဲ့သူတွေဆိုရင် ဒီလိုမလုပ်ဘူးပေါ့ဗျာ။ သူတို့ပါတီက ပြည်သူအားလုံးထောက်ခံထားတဲ့ ပြည်သူ့ပါတီဆိုရင်တော့ တစ်မျိုးပေါ့။ ခုတော့ အဲလိုလည်းမဟုတ်ဘူးဆိုတော့လေ”ဟု ဦးသုဝေကပြောသည်။

၂၀၁၅ ရွေးကောက်ပွဲကျင်းပရန်လည်း လအနည်းငယ်သာလိုတော့သည်။ ပြည်ခိုင်ဖြိုးစတင်ဖွဲ့စည်းသည့် ၁၉၉၃ ခုနှစ်မှစတင်ပြီး ပါတီအဖြစ်ပြောင်းလဲကာ အစိုးရဖွဲ့စည်းနိုင်ခဲ့သည့် ၂၀၁၅ အထိ ၂၂ နှစ်တာကာလအတွင်း ပြည်ခိုင်ဖြိုး၏ ထိပ်ပိုင်းခေါင်းဆောင်များသာ တိုင်းပြည်ခေါင်းဆောင်နေရာ အစဉ်အဆက်ရရှိခဲ့သည်။

ယင်းအစဉ်အလာကို ပြည်ခိုင်ဖြိုးဆက်လက်ထိန်းသိမ်းနိုင်ခြင်းရှိ၊ မရှိကို မဲဆန္ဒရှင်များက ဆုံးဖြတ်မည်ဖြစ်သည်။ နိုင်ငံရေးနယ်ပယ်တွင် ပြည်ခိုင်ဖြိုးက အခြားပါတီများထက် နှာတစ်ဖျားသာမသာကိုတော့ ရွေးကောက်ပွဲအဖြေ မဲရေတွက်ပြီးချိန်အထိ စောင့်စားရဦးမည်။

သို့သော် သေချာတာတစ်ခုကတော့ ပြည်ခိုင်ဖြိုးက အခြားပါတီများထက် ပါတီရန်ပုံငွေနှင့် ပိုင်ဆိုင်မှုအင်အားက အစစအရာရာ အသာစီးရနေမည်မှာတော့ အသေအချာပင်ဖြစ်သည်။
ရေးသားသူ- ရန်မျိုးနိုင်၊ ထွန်းခိုင်၊ မင်းဟိန်းကျော်

 
Copy from - 7Day News Journal

0 comments: