Wednesday, November 13, 2013

OIC မလာရေး ရန်ကုန်မှာ လူ ၅၀၀ လောက် ဆန္ဒပြ

 
OIC ခေါ် အစ္စလာမ်မစ်နိုင်ငံများ ပူးပေါင်းဆောင်ရွက်ရေးအဖွဲ့ကိုယ်စားလှယ်တွေ မြန်မာနိုင်ငံကို လာရောက်လေ့လာမယ့်ခရီးစဉ်ကို ကန့်ကွက်ကြသူ သံဃာတော်တွေနဲ့ လူပုဂ္ဂိုလ် ၅၀၀ ကျော်ဟာ ရန်ကုန်မြို့မှာ ဒီနေ့နေ့လည်ပိုင်းက လမ်းလျှောက်ဆန္ဒပြခဲ့ကြပါတယ်

ဆန္ဒပြသူတွေဟာ ရွှေတိဂုံဘုရား အရှေ့ဘက်မုခ်မှာရှိတဲ့ ကြေးသွန်းဘုရားကြီးရှေ့ကနေ ရန်ကုန်မြို့ မြို့တော်ခန်းမရှေ့အထိ လမ်းလျှောက်ချီတက် ဆန္ဒပြခဲ့ကြတာပါ။ အခုလို ဆန္ဒပြရတာနဲ့ ပတ်သက်လို့ ဆန္ဒပြပွဲမှာပါဝင်တဲ့ သံဃာတော်တစ်ပါးက အခုလိုမိန့်ပါတယ်။

"ဦးဇင်းတို့နိုင်ငံမှာရှိတဲ့ ဘာသာခြားတွေကို ဦးဇင်းတို့က ဆန္ဒဖော်ထုတ်တာမဟုတ်ပါဘူး၊ မဆိုင်ပါဘူး၊ တခြားနိုင်ငံကနေပြီးတော့ ဦးဇင်းတို့နိုင်ငံကိုလာပြီးတော့ အချုပ်အချာအာဏာကိုလာပြီးတော့ ထိပါးမယ်ဆိုရင် ဦးဇင်းတို့ရဲ့ နိုင်ငံမှာရှိတဲ့ ဘာသာရေးကို ပြိုကွဲအောင်ဖျက်ဆီးမယ်ဆိုရင် နိုင်ငံရေးပဋိပက္ခဖြစ်အောင်၊ ဘာသာရေးပဋိပက္ခဖြစ်အောင် ဖျက်ဆီးမယ်ဆိုရင် ဦးဇင်းတို့က ဒါကိုသူတို့ကိုလုံးဝမလာဖို့ ဆန္ဒဖော်ထုတ်ခြင်းဖြစ်ပါတယ်"

ဒါ့အပြင် ရန်ကုန်တိုင်း အင်းစိန်မြို့နယ်မှာ ရခိုင်လူငယ်အဖွဲ့က ဦးဆောင်တဲ့ လူအင်အား ၃၀ လောက်ဟာ OIC အဖွဲ့လာရောက်မှာကို ကန့်ကွက်တဲ့အနေနဲ့ ဒီနေ့ နေ့လည် ၁၂ နာရီလောက်က အင်းစိန်မြို့နယ် GTI ကျောင်းဝင်းရှေ့ကနေ ရန်ကုန်နည်းပညာတက္ကသိုလ် ကျောင်းဝင်းရှေ့အထိ လမ်းလျှောက်ချီတက် ဆန္ဒပြခဲ့ကြပါတယ်။

OIC ခေါ် အစ္စလာမ်မစ်နိုင်ငံများ ပူးပေါင်းဆောင်ရွက်ရေးအဖွဲ့က ကိုယ်စားလှယ်တွေဟာ လာမယ့် ၁၄ ရက်နေ့မှာ မြန်မာနိုင်ငံကို ရောက်ရှိမှာဖြစ်ပြီး ခရီးစဉ်အတွင်း ရခိုင်ပြည်နယ်နဲ့ မိတ္ထီလာမြို့တွေမှာရှိတဲ့ မွတ်စလင် ဒုက္ခသည်စခန်းတွေကို သွားရောက်လေ့လာမယ်လို့လည်း သိရပါတယ်။
 
Copy from - RFA Burmese

0 comments: