Saturday, April 6, 2013

ကျန်းမာရေး စောင့်ရှောက်မှု တိုးတက်အောင် NLD ဆောင်ရွက်မည်


နှစ်ပေါင်းများစွာ နိမ့်ကျခဲ့တဲ့ မြန်မာနိုင်ငံရဲ့ ကျန်းမာရေးစနစ် ပြန်လည် ကောင်းမွန်လာဖို့အတွက် ပြည်တွင်း၊ ပြည်ပ အဖွဲ့အစည်းများနဲ့ ချိတ်ဆက် ဆောင်ရွက်သွားမယ်လို့ ဒေါ်အောင်ဆန်းစုကြည်က ဒီကနေ့မှာ ပြောကြား လိုက်ပါတယ်။

ရန်ကုန်မြို့ Park Royal ဟိုတယ်မှာ ဒီကနေ့ မနက်ပိုင်းက ကျင်းပတဲ့ NLD ပါတီရဲ့ အမျိုးသား ကျန်းမာရေး ကွန်ရက် ဖွင့်ပွဲ အခမ်းအနားမှာ အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်က မြန်မာပြည်သူတွေအတွက် ကျန်းမာရေး စောင့်ရှောက်မှုစနစ်  တိုးတက် ကောင်းမွန်လာဖို့ အမြန်ဆုံး စတင်ဆောင်ရွက်ဖို့ လိုအပ်နေပြီ ဖြစ်ကြောင်း၊ အနာဂတ် မျိုးဆက်တစ်ခုအထိ အချိန်မဆိုင်းတော့ပဲ  အခုအချိန်ကစပြီး ဆောင်ရွက်ရမယ်လို့ ဒေါ်အောင်ဆန်းစုကြည်က ပြောခဲ့ပါတယ်။

အဲဒီလိုဖြစ်ဖို့အတွက် ရန်ကုန်ပြည်သူ့ဆေးရုံကြီး အပါအ၀င် တစ်နိုင်ငံလုံးမှာရှိတဲ့ အစိုးရဆေးရုံအားလုံးကို အဆင့်မြှင့်တင်သွားမှာ ဖြစ်ကြောင်း၊ ဆေးရုံတွေကို အဆင့်မြှင့် တင်လိုက်တဲ့အတွက် မြန်မာနိုင်ငံရဲ့ ကျန်းမာရေး ကဏ္ဍကြီး တစ်ခုလုံးအတွက် ကြီးမားတဲ့ ပြောင်းလဲတိုးတက်မှု ရရှိလာစေမှာ ဖြစ်ကြောင်း
ဒေါ်အောင်ဆန်းစုကြည်က ပြောပါတယ်။

ဒါ့ပြင်တစ်နိုင်ငံလုံးမှာရှိတဲ့ ဆရာဝန်၊ သူနာပြု၊ ၀မ်းဆွဲဆရာမတွေအပါအ၀င် ကျန်းမာရေးဝန်ထမ်းအားလုံးရဲ့ ဘ၀အဆင့်အတန်း မြင့်မားလာအောင် ကြိုးပမ်းဆောင်ရွက်သွားမယ်လို့လည်း သူကပြောပါတယ်။

မြန်မာနိုင်ငံရဲ့ ကျန်းမာရေးစနစ် ပြန်လည်ကောင်းမွန်ဖို့အတွက် ကမ္ဘာ့နောက်ဆုံးပေါ် ကျန်းမာရေးအစီအစဉ်တွေကို နမူနာယူပြီး အကောင်ထည်ဖော်သွားမှာ ဖြစ်တယ်လို့ NLD အမျိုးသားကျန်းမာရေးကွန်ရက် ဥက္ကဌ ဒေါက်တာတင်မျိုးဝင်းကလည်း အခမ်းအနားမှာ ပြောကြားခဲ့ပါတယ်။

ဒေါ်အောင်ဆန်းစုကြည် ဥက္ကဌအဖြစ် တာဝန်ယူဆောင်ရွက်နေတဲ့ ရန်ကုန်ပြည်သူ့ဆေးရုံကြီး အဆင့်မြှင့်တင်ရေး ကော်မတီအနေနဲ့လည်း ဆေးရုံပြန်လည်တည်ဆောက်ရေး ရန်ပုံငွေအလှူငွေတွေ လက်ခံနေပြီး၊ ဒေါက်တာတင်မျိုးဝင်းကတဆင့် ကူညီလှူဒါန်းနိုင်တယ်လို့ သိရပါတယ်။
 
Copy from - RFA Burmese

0 comments: