Wednesday, April 10, 2013

ပိုက်လိုင်း ကျိုးပေါက် ပွင့်ထွက်မှု

 
ရခိုင်ပြည်နယ်မှ တရုတ်နိုင်ငံသို့ ဆက်သွယ်မည့် ရွှေ သဘာဝဓာတ်ငွေ့ ပိုက်လိုင်း ဖြတ်သန်းရာ လမ်းကြောင်း၌ ပါဝင်သည့် ရှမ်းပြည်နယ်အတွင်းရှိ မြို့နယ်တချို့တွင် ပိုက်လိုင်းထဲသို့ ရေ စမ်းသပ် လွှတ်ရာမှ ပိုက်လိုင်း ကျိုးပေါက် ပွင့်ထွက်မှုများ ဖြစ်ပွားခဲ့ကြောင်း သိရသည်။

 “ပိုက်လိုင်း သန့်ရှင်းရေး လုပ်တဲ့အနေနဲ့ ရေ စမ်းလွှတ်တာက ပေါက်ကွဲမှု ဖြစ်တယ်၊ စုစုပေါင်း ၄ ကြိမ် ဖြစ်ဖူးတယ်။ ဂက်စ်တောင် မပို့လွှတ်ရသေးဘူး၊ ဒီလို ဖြစ်နေတော့ ဒေသခံတွေက တအား စိုးရိမ် ကြောက်လန့်မှုတွေ ဖြစ်နေကြတယ်” ဟု တအာင်း ကျောင်းသားနှင့် လူငယ်များအဖွဲ့ချုပ်မှ သတင်းနှင့် လူ့အခွင့်အရေး မှတ်တမ်း တာဝန်ခံ မိုင်းအိုက်မွန်းက ဧရာဝတီသို့ ပြောသည်။

 ဓာတ်ငွေ့ ပိုက်လိုင်းသည် ခိုင်ခန့်မှု မရှိခြင်း၊ စနစ်တကျ မြှုပ်နှံမှု မရှိခြင်းတို့ကြောင့် စမ်းသပ်စဉ် ကာလ၌ပင် ကျိုးပေါက် ပွင့်ထွက်မှု ဖြစ်နေကြောင်း၊ နမ္မတူ၊ နမ့်ခမ်း၊ ကျောက်မဲ စသည့် မြို့နယ်တို့၌ ပြီးခဲ့သည့် ဖေဖော်ဝါရီလနှင့် မတ်လတွင် ၂ ကြိမ်၊ ၂၀၁၂ ခုနှစ် နှောင်းပိုင်းတွင် ၂ ကြိမ် ကျိုးပေါက် ပွင့်ထွက်မှု ဖြစ်ပွားခဲ့ကြောင်း သိရသည်။ ပိုက်လိုင်းသည် ရှမ်းပြည်နယ် မြောက်ပိုင်းရှိ နမ့်ခမ်း၊ နမ္မတူ၊ သီပေါ၊ မန်တုံ၊ နောင်ချို၊ ကျောက်မဲ စသည့်မြို့နယ်များကို ဖြတ်၍ တရုတ်နိုင်ငံ၊ ယူနန်ပြည်နယ်၌ အဆုံးသတ်မည် ဖြစ်သည်။

 ရွှေ သဘာဝ ဓာတ်ငွေ့ပိုက်လိုင်းသည် ရခိုင်ပြည်နယ်၊ ကျောက်ဖြူဒေသ၌ တည်ဆောက်နေပြီး သဘာဓာတ်ငွေ့များကို လာမည့် မေလမှစတင်၍ တရုတ်နိုင်ငံသို့ ပို့လွှတ်တော့မည်ဟု ဂက်စ်ပိုက်လိုင်း စီမံကိန်းကို ဦးဆောင် တည်ဆောက်နေသည့် တရုတ်အမျိုးသား ရေနံကော်ပိုရေးရှင်း (China National Petroleum Corporation – CNPC) ကုမ္ပဏီမှ ပြောဆိုထားသည်။

သတင်းရင်းမြစ် - Minmaha Bagan (FB) သတင်းစာမျက်နှာမှ

0 comments: