Wednesday, March 20, 2013

ပလောင်ပြည်နယ်လွတ်မြောက်ရေးတပ်ဦး- P.S.L.F ၏ရှင်းလင်းချက်

လက်ဖက်လုပ်ငန်းဖြင့် အသက်မွေးဝမ်းကျောင်း ပြုနေသည့် တအာင်းပြည်သူလူထု အပေါ်
ပလောင်ပြည်နယ်လွတ်မြောက်ရေးတပ်ဦး- P.S.L.F ၏
ရှင်းလင်းချက်
၂၀ ရက်၊ မတ်လ၊ ၂ဝ၁၃ ခုနှစ်။ ထုတ်ပြန်ချက်အမှတ်။ ဝဝ၂§၀၅§ဌနခ-၁၃
၁။ တပေါင်းလပြည့်ကျော်မှ စတင်၍ လက်ဖက်တောင်သူ တအာင်းမိဘပြည်သူတို့ အားထားရသည့် ရွှေဖီချိန် လက်ဖက် ရာသီ ရောက်ရှိလာပြီ ဖြစ်ပါသည်။ ယခု ၂၀၁၃ ခုနှစ် ရွှေဖီ လက်ဖက်ရာသီတွင် တအာင်း မိဘပြည်သူများ မျှော်လင့် တောင့်တထားသည့်အတိုင်း လက်ဖက်များ လှိုင်လှိုင်ဖူးဝေ ထွက်ရှိပြီး၊ သင့်တင့်မျှတ တည်ငြိမ်သည့် လက်ဖက်ဈေးကွက် ကိုထိန်းသိမ်း ရရှိနိုင်ပါစေကြောင်း ပလောင်ပြည်နယ်လွတ်မြောက်ရေး တပ်ဦးမှ ဆုမွန်ကောင်း ပို့သလိုက်ပါသည်။
၂။ ဒေသခံတအာင်း မိဘပြည်သူအများစုသည် လက်ဖက်လုပ်ငန်းဖြင့် အဓိက အသက်မွေးဝမ်းကျောင်း ပြုကာ နေထိုင်စား သောက်ကြရပါသည်။ တပေါင်းလပြည့်ကျော်မှ ကဆုန်လဆန်းထိ လက်ဖက် ထွက်ရှိသော ရွှေဖီချိန် ကာလသည် တအာင်းလူမျိုးအတွက် တနှစ်သာ စားဝတ်နေရေး ပြေလည်ရန် အလွန် အရေးကြီးသော အချိန်ခါသမယ ဖြစ်ပါသည်။
၃။ P.S.L.F နှင့် မြန်မာ အစိုးရအကြား နိုင်ငံရေးပြဿနာ ဖြေရှင်းနိုင်ခြင်း မရှိသေးသဖြင့် တအာင်းဒေသ တခွင်တွင် အခြေချ လှုပ်ရှားနေသည့် တအာင်းအမျိုးသား လွတ်မြောက်ရေး တပ်မတော်T.N.L.A နှင့်
ထိုးစစ်ဆင်လာသည့် မြန်မာစစ်တပ်ဖွဲ့တို့ ဒေသတွင်းတွင် လက်နက်ကိုင် တိုက်ပွဲဖြစ်ပွား နေပါသည်။ ယခု ၂ဝ၁၃ ခုနှစ် သုံးလ နီးပါးကာလ အတွင်းတွင်ပင် တိုက်ပွဲထိတွေ့မှု ၂၀ ကြိမ်ခန့်ဖြစ်ပွား ခဲ့ပါသည်။
၎။ မြန်မာစစ်တပ်ဖွဲ့၏ ထိုးစစ်ဆင် လှုပ်ရှားမှု မည်ကဲ့သို့ပင် များပြားစေကာမူ လက်ဖက်တောင်သူ မိဘပြည်သူတို့အား စာနာ ထောက်ထား ကာကွယ်ရန် တာဝန်ရှိသည်ဟု တပ်ဦးအနေဖြင့် အစဉ် ခံယူ ရပ်တည်ထားပါသည်။ ထိုကြောင့် ရွှေဖီချိန် လက်ဖက် ရာသီတွင် လက်ဖက်လုပ်ငန်းကို အဓိကထား လုပ်ကိုင်နေသော တအာင်းဒေသ ကျေးရွာများတွင် လက်နက်ကိုင် တိုက်ပွဲဖြစ်ပွားခြင်း မပြုလုပ်ရန် ဒေသအတွင်း အခြေချထားသည့် တအာင်းတပ်ဖွဲ့များအား ညွှန်ကြားထားပြီး ဖြစ်ပါသည်။ ရွှေဖီလက်ဖက် ရာသီကာလအတွင်းတွင် လက်ဖက်လုပ်ငန်း အဓိကလုပ်ကိုင်နေသည့် တအာင်းဒေသ၌ လက်နက်ကိုင် တိုက်ပွဲ (လုံးဝ) မဖြစ်ပွားစေရန် ထိန်းသိမ်းမည် ဖြစ်ကြောင်း အသိပေးအပ်ပါသည်။
၅။ ထိုကြောင့် လက်ဖက်လုပ်ငန်းကို အဓိက မှီခိုအားထားနေကြရသည့် တအာင်း မိဘပြည်သူများ၊ လက်ဖက်လုပ်ငန်းဖြင့် မှီခိုလုပ်ကိုင် နေသူများအားလုံး ရွှေဖီလက်ဖက် ရာသီတွင် စစ်မက်ဖြစ်ပွားမည့် ကြောက်ရွှံ့မှုမရှိဘဲ ကိုယ်စိတ်လုံခြုံမှုရှိစွာ ဖြင့် လက်ဖက်လုပ်ငန်းကို လွတ်လပ် အေးချမ်းစွာ လုပ်ကိုင်စားသောက်ကြပါရန် ပလောင်ပြည်နယ် လွတ်မြောက်ရေးတပ်ဦး အနေဖြင့် လေးစားစွာ ရှင်းလင်း တင်ပြအပ်ပါသည်။
ဗဟိုအလုပ်အမှုဆောင်ကော်မတီ
ပလောင်ပြည်နယ်လွတ်မြောက်ရေးတပ်ဦး- P.S.L.F

0 comments: