Saturday, March 2, 2013

မေခမြစ်ဒေသမှာ KIOနဲ့ အစိုးရတပ်တွေ တိုက်ပွဲ ဆက်လက်ဖြစ်ပွါး

 

မြန်မာပြည် မြောက်ပိုင်း မေခမြစ်ဒေသ ဆော့လော် လော့ခေါင်ဒေသမှာ ကေအိုင်အိုနဲ့ အစိုးရတပ်တွေ မနေ့ကအထိ တိုက်ပွဲတွေ ဆက်လက်ဖြစ်ပွါးနေပါတယ်။ အဲဒီတိုက်ပွဲမှာ ဦးစခုံတိန့်ယိမ်း ဦးဆောင်တဲ့ ပြည်သူ့စစ်အဖွဲ့တွေကလည်း အစိုးရ တပ်တွေဘက်က ပါဝင် ခဲ့တယ်လို့ သိရပါတယ်။

ကချင်ပြည်နယ် ကေအိုင်အို ဗဟိုဒေသ၊ တပ်မဟာ ၄၊ တပ်မဟာ၃နဲ့ တပ်မဟာ၂ ဒေသတွေမှာ အခုတလော တိုက်ပွဲတွေ မဖြစ်ပေမယ့် မေခမြစ် အရှေ့ဖက်ခြမ်း လောခေါင်နဲ့ ဆော့လော်ကြားက တောင်ကြောတွေမှာ မနေ့ကအထိ တိုက်ပွဲတွေ ဖြစ်ပွါးနေတဲ့အကြောင်း ကေအိုင်အို စစ်မဟာဗျူဟာ လေ့လာရေး ဌာနမှုး ဗိုလ်မှုးကြီးဇော်တောင်က RFA ကို ခုလို ပြောပြပါတယ်။

“မနေ့ကတော့ သူတို့ဒေသအခေါ် စုစည်းလို့ခေါ်တဲ့ ရွာရှိတယ်၊ အခုတော့ လူမရှိတော့ဘူးပေါ့၊ အဲဒီရွာရဲ့ အပေါ်ကုန်း တောင်ကြော တလျှောက်မှာ တိုက်ပွဲတွေ ဖြစ်တယ်၊ တချို့နေရာတွေကတော့ ကျနော်တို့ ဆုတ်ပေး လိုက်ရတာတွေရှိတယ်၊ တချို့နေရာကျတော့ ကျနော်တို့တပ်တွေ နေရာ ပြန်ယူထားတဲ့ဟာတွေ ရှိတယ်၊ အဲ့ဒီတောင်ကြော တလျှောက်မှာပဲ မြစ်ကြီးနားက ၂၉ ရယ်၊ ၂၆၀ ရယ်၊ ၇၄ ရယ်၊ ပြီးတော့ ဘီဂျီအက်ဖ်တွေနဲ့ ပြည်သူ့စစ်တွေလဲ ပါတယ်၊ မနေ့ကပဲ ကျနော်တို့ ရတဲ့သတင်းအရ ဆွမ်ပရာဘွမ်
လမ်းကြောမှာ ရှိနေတဲ့ တပ်မ ၃၃ က အဖွဲ့တွေလဲ အဲဒီဘက်ကို ပြန်ပြီးမှ အင်အား ထပ်ဖြည့်နေတယ်လို့  ကြားတယ်”

အဲဒီဒေသမှာ ကေအိုင်အို တပ်မဟာ ၁ လက်အောက်ခံ တပ်ရင်း ၁၀ နဲ့ မြစ်ကြီးနား ကျွန်းပင်သာအခြေစိုက် ခလရ ၂၉၊ မိုးကောင်း အခြေစိုက် ခလရ ၇၄ ၊ မရမ်းအခြေစိုက် ခလရ ၂၆၀ စတဲ့ အစိုးရ တပ်ရင်းတွေ တိုက်ပွဲဖြစ်နေတာ ဖေဖေါ်ဝါရီလ ၂၁ ရက်နေ့ ကတည်းကဖြစ်ပြီး ၂ ဖက် ထိခိုက် ကျဆုံးတာတွေတော့ အခုထိ အသေးစိတ် မသိရသေးဘူးလို့ သူကပြောပါတယ်။ အဲဒီတိုက်ပွဲတွေမှာ ဦးစခုံတိန့်ယိမ်းဖွဲ့စည်းထားတဲ့ ပြည်သူ့စစ် အင်အား အများအပြား ပါဝင်တယ်လို့ ဗိုလ်မှုးကြီးဇော်တောင်က ပြောပါတယ်။

“ဦးစခုံတိန့်ယိမ်းလဲ ပြည်သူ့စစ် တပ်တွေဖွဲ့ပြီးမှ ပြန်တိုက်ခိုင်းနေတာ၊ သူ့ရဲ့ အကျိုးစီးပွါးအတွက်ပေါ့၊ သူက အဲဒီဘက်မှာ ဟိုးဘုတ်တိုင် ၇ အထက်နားလောက်မှာ သတ္တုမိုင်း တစ်ခုရှိတယ်၊ အဲဒီမှာသူ့အကျိုးကျေးဇူးက တော်တော်ရတာကိုး၊ ဒါကြောင့် အဲဒါကို အေးအေးဆေးဆေး လုပ်စားနိုင်အောင် ဆိုပြီးမှ ပြည်သူ့စစ်ဖွဲ့ပြီးမှ တိုက်ခိုင်းနေတာ၊ အဲဒီမှာရှိတဲ့ လီဆူးတွေရော လဝေါ်တို့ လချိတ်တို့ အားလုံးကိုစုပြီးမှ ဆိုရင်တော့ လေးငါးခြောက်ရာတော့ ရှိမယ်ထင်တယ်၊ တချို့ ရည်မှန်းချက်ကတော့ သူတို့ ဒီလူကြားကောင်းအောင် ပြောတာတော့ ချီဖွေနဲ့ လောခေါင်ဆော့လော အဲဒီအကြောက သူတို့ဆက်သွယ်ရေး လမ်းကြောင်းကို သူတို့ပြန်ပြီးမှ စိုးမိုးနိုင်အောင်ဆိုတဲ့ သဘောမျိုးလဲပါတယ်”

ဒီကိစ္စတွေနဲ့ ပတ်သက်လို့ RFA က ဦးစခုံတိန့်ယိမ်းကို ဆက်သွယ်ဖို့ ကြိုးစားပေမယ့် ဖုန်း အခက်အခဲကြောင့် ဆက်သွယ်လို့ မရပါဘူး။ ဦးစခုံတိန့်ယိမ်းဟာ ဒီမိုကရေစီသစ် တပ်မတော် ကချင် NDAK အဖွဲ့ခေါင်းဆောင်ဖြစ်ပီး ၂၀၀၉ ခုနှစ်မှာ နယ်ခြားစောင့် တပ်ဖွဲ့ဖို့ အစိုးရနဲ့ သဘောတူခဲ့တဲ့ သူဖြစ်ပါတယ်။

Copy from - RFA Burmese

0 comments: