Thursday, March 7, 2013

ငြိမ်းချမ်းရေး လမ်းလျှောက်သူများ ကချင်ပြည်နယ် ဆားမှော်နှင့် မိုးမောက်မြို့သို့ ရောက်ရှိနေပြီ

 
၂၀၁၃ မတ် ၀၇ ရက်။

ရန်ကုန်မြို့မှ လိုင်ဇာမြို့ထိ ကိုရန်နိုင်ထွန်း ဦးဆောင်သော ငြိမ်းချမ်းရေး လမ်းလျှောက် အဖွဲ့သည် ယနေ့ မိုးကောင်းမြို့နယ် ဆားမှော်မြို့တွင် ရောက်ရှိနေပြီး တခြားအဖွဲ့သည် ဗန်းမော်မြို့နယ် မိုးမောက်မြို့သို့ ရောက်ရှိနေပြီ ဖြစ်ကြောင်း နှစ်ဖွဲ့လုံးမှ အဖွဲ့ဝင်များက ပြောသည်။

ဧရာဝတီမြစ် အနောက်ဘက်မှ လမ်းလျှောက်အဖွဲ့သည် ယနေ့နံနက်မိုးကောင်း မြို့နယ် သောင်နီကျေးရွာမှ ထွက်ခွာလာပြီး ဆားမှော်မြို့တွင် တည ရပ်နားမည် ဖြစ်သည်ဟု အဆိုပါအဖွဲ့မှ ကိုဝင်းချိူက ပြောသည်။

၎င်းက “ခြေထောက်နာနေတဲ့ သူတွေကို ကျနော်တို့ မြစ်ကြီးနားရောက်တဲ့ထိ သူတို့ကို ဆရာဝန်က အနားယူဖို့ ပြောပါတယ်။ ကျနော်တို့ မြစ်ကြီးနား ရောက်တဲ့ထိ သူတို့ အနားယူပါစေဆိုတဲ့ ဆန္ဒနဲ့ အခု သူတို့ကို ပို့ပါမယ်”ဟု ပြောသည်။ ယင်းအဖွဲ့ထဲမှ ကျန်းမာရေးချို့ယွင်းနေသော ကိုကျော်ဝင်း၊ ကိုမောင်မောင်နှင့် ဒေါ်သန်းသန်းဝင်းတို့သည်ခြေထောက် ပိုင်းဆိုင်ရာ ဒူးခေါင်း၊ အဆစ်များတွင် နာကျင် နေသောကြောင့် ဆရာဝန်က အနားယူရန် ညွန်ကြားသဖြင့် မိုးကောင်း ဆေးရုံမှတဆင့် မြစ်ကြီးနား ဆေးရုံသို့ ယနေ့ ပို့ဆောင်မည် ဖြစ်ပြီး ဆေးရုံတွင် ဆေးကုသမှု ခံယူရင်း အနားယူစေမည် ဖြစ်ကြောင်းသူက ဆက်ပြောသည်။

ထို့ပြင် ယခုလ ၁ ရက်နေ့က ခြေထောက်တွင် အရွတ်များ နာကျင်နေသော သံယာ ဦးဝဏ္ဏသီရိအား မြစ်ကြီးနား ဆေးရုံသို့ ပို့လိုက်ပြီး ဆေးကုသမှု ခံယူနေသည်ဟု သိရသည်။ မိုးကောင်းမြို့နယ် ပင်းဘော ကျေးရွာတွင် ရပ်နားစဉ် လမ်းလျှောက်အဖွဲ့ အစားအသောက် စရိတ် အနေဖြင့် အစိုးရ၏ စရဖ က ကျပ်ငါးသောင်း၊ ကချင်လွတ်လပ်ရေးအဖွဲ့ KIO က ကျပ်ငါးသိန်း လှူဒါန်း ခဲ့သည်ဟု ကိုဝင်းချိူ ပြောပြခဲ့သည်။ လမ်းတလျှောက် လက်ခံရရှိသေး အလှူငွေမှာ ၂၂၇သိန်း ရရှိကာ မိုးညှင်းမြို့ရှိ စစ်ပြေး ဒုက္ခသည် စခန်းတခုတွင် ၁၀သိန်း၊ ရန်ကုန်ဆေးရုံကြီးနှင့် မိုးညှင်းဆေးရုံ တွင်မိုင်းထိ၍ ဆေးကုသမှု ခံယူနေသူ လေးဦးတို့အား ကျပ်တသိန်းဆီ လှူဒါန်းခဲ့ သဖြင့် စုစုပေါင်း ၁၄သိန်း လှူဒါန်းနိုင်ခဲ့ပြီ ဖြစ်ကြောင်း အဖွဲ့တာဝန်ခံ လူငယ် ကိုသူရအောင်က ပြောသည်။

“ကချင်ပြည်နယ်ထဲ ရောက်တဲ့အခါမှာ နှစ်ဖက် တာဝန်ရှိသူတွေ ပြည်သူတွေ အားလုံးက ကြိုဆို ကြပါတယ်။ ကျနော်တို့က သာမန် ပြည်သူတွေပါ။ ဒါပေမဲ့ ငြိမ်းချမ်းရေးကို အားလုံးက မက်မက်မောမော  လိုချင်နေပြီဆိုတာ တွက်ဆလို့ ရပါတယ်”ဟု သူက ပြောသည်။

ရန်ကုန်မြို့မှ စတင် လမ်းလျှောက်လာစဉ် လူပေါင်း ၂၂ ဦးသာ လိုက်ပါ ခဲ့သော်လည်း ယခု လမ်းလျှောက်သူ သံဃာနှင့် လူပေါင်း ၁၂၄ ဦး ရှိနေပြီ ဖြစ်ကြောင်း သိရသည်။ ဧရာဝတီမြစ် အရှေ့ဘက်မှ လိုင်ဇာမြို့သို့ လမ်းလျှောက်နေသည့် မန္တလေးနှင့် မြင်းခြံဘက်မှ ကိုသန့်ဇင် ဦးဆောင်သော အဖွဲ့သည်လည်း ယနေ့ အင်္ဂါနေ့တွင် ကချင်ပြည်နယ် မိုးမောက်မြို့သို့ ရောက်ရှိနေပြီး စစ်ပြေးဒုက္ခသည် စခန်းများသို့ သွားရောက် လေ့လာ၍ ယင်းတို့ လက်ခံရရှိသော ဆေးဝါးနှင့် အစားအသောက် ပစ္စည်းများ လှူဒါန်းခဲ့သည်ဟု ကိုသန့်ဇင်က ပြောသည်။

“မိုးမောက်မြို့မှာ နှစ်ညအိပ်ရပ်နားနေတယ်။ အခု ဒုက္ခသည် စခန်းတွေကို သွာရောက် အားပေးစကား ပြောပြီး စားသောက်စရာနဲ့ ဆေးဝါးတွေ လှူဒါန်းမလို့ ချီတက်နေပါတယ်”ဟု သူက ပြောသည်။

ထိုအဖွဲ့သည်လည်း မူလက ၁၀ ဦးသာရှိခဲ့ရာမှ လမ်းတလျှောက်ပါဝင်လာသူများ ရှိသဖြင့် သံဃာ အပါး ၉ ပါး အမျိုးသမီး ၃ ဦး၊ အမျိုးသား ၂၉ ဦး ယခု စုစုပေါင်း ၄၁ ဦး ရှိသွားပြီ ဖြစ်ကာ ယင်းတို့အားလုံး ခြေထောက်တွင် အနည်းအကျဉ်းသာ ဒဏ်ရာရကာ ကျန်းမာရေးကောင်းမွန်နေသည်ဟု ဆိုသည်။လိုင်ဇာရောက်ရန် မိုင်ပေါင်း ၅၀ ဝန်းကျင်သာ လိုတော့သဖြင့် မနက်ဖြန်မှာ မိုးမောက်မြို့မှ ထွက်ခွာပြီး ကုန်လောကျေးရွာတွင် နှစ်ည ရပ်နားကာ ဒေါ့ဖုန်းယန်တွင် တညအိပ် ရပ်နားပြီး လာမည့် မတ်လ ၉ ရက်နေ့တွင် လိုင်ဇာမြို့သို့ ရောက်ရှိမည်ဟု ကိုသန့်ဇင်က ပြောသည်။လမ်းလျှောက်သည့် အဖွဲ့များ လျော့နည်းစေရန် လိုင်ဇာသွားသည့် လမ်းတလျှောက်တွင် မိုင်းများရှိနိုင်ကြောင်း အန္တရာယ်ရှိနိုင်သည်ဟု ကောလဟလသတင်းများဖြင့် ချောက်လှန့်မှုများ ရှိနေသော်လည်း ယင်းအဖွဲ့အနေဖြင့် လိုင်ဇာမြို့သို့ အရောက်ချီတက်မည်ဟု ပြောသည်။

“အစိုးရက ကာကွယ်ရေးမှာ တာဝန်ရှိတဲ့ လူတွေကို ပြောလိုက်ပါ။ ကျနော်တို့က မိုင်းရှိရင် နင်းသွားမယ်။ ကိုယ်ထောင်တဲ့မိုင်း ကိုယ်တာဝန်ယူပြီးတော့မှ ဖယ်ရှားပေးပါ။ နှစ်ဖက် စစ်တပ်ကို ကျနော်က မေတ္တာရပ်ခံတယ်”ဟု ကိုသန့်ဇင်က ပြောသည်။

လမ်းတလျှောက် ပြည်သူများလှူဒါန်းခဲ့သော အလှူငွေ ၁၃၉ သိန်းကျော် လက်ခံရရှိပြီ ဖြစ်ပြီ ယင်းအဖွဲ့အား ပြည်သူများ ဧည့်ခံ ကြိုဆိုခြင်း၊ နေရာထိုင်ခင်းများပေးခြင်း၊ အလှူငွေများ ပေးခြင်းသည် ပြည်သူအားလုံးသည် ငြိမ်းချမ်းရေး အမှန်တကယ်လိုလားခြင်းကို ပြသနေသည်ကို တွေ့မြင့်ရသည်ဟု ပြောသည်။
အဆိုပါ အလှူငွေများအား စစ်ပြေးဒုက္ခသည်များအား လှူဒါန်းမည့် ပမာဏ နည်းပါးသော်လည်း အဖွဲ့အနေဖြင့် ငြိမ်းချမ်းရေးရလိုသည့် သတင်းအား ယူဆောင်လာခြင်းသာ ဖြစ်သည်ဟု ဆိုသည်။လမ်းတလျှောက် မန်စီ၊ ဗန်မော်၊ မိုးမောက်မြို့များမှ စစ်ပြေးဒုက္ခသည်စခန်းများသို့ သွားရောက်ခဲ့ရာမိုးမောက်မြို့ရောဘတ်ကချင်နှစ်ခြင်းအသင်းတော် ဘုရားကျောင်းအတွင်း လူ ၃၀၀၀ ခန့် ကြပ်တည်းစွာ ခိုလှုံနေထိုင်ရခြင်း၊ ကလေးငယ် ၁၀၅၀ တွေ့မြင်ခဲ့ရသလို၊ စာသင်ခန်းတွင် ရှိနေရမည့် ကလေးအခွင့်အရေးများ ဆုံးရှုံးနေမှုများ တွေ့မြင်ခဲ့ရသည်ဟု သူက ပြောသည်။

“သူတို့မှာ စိတ်အားငယ်စိတ်တွေ၊ စိုးရိမ်ကြောင့် ကျမှုတွေ တော်တော်များများတွေ့ရတယ။် ကျနော် စကားပြောတဲ့ အချိန်မှာဆိုရင် မျက်ရည်ကျနေတဲ့ အမျိုးသမီးတွေကို တွေ့ရတယ်။ စိတ်မကောင်းစရာတွေ တွေ့ရတယ်”ဟု ကိုသန့်ဇင်က ပြောသည်။

0 comments: