Monday, February 25, 2013

နီပွန်ဖောင်ဒေးရှင်း ဥက္ကဋ္ဌ ယိုဟေးအီဆာဆာကာဝါ နှင့် တွေ့ဆုံခြင်း



ဂျပန်နိုင်ငံက မြန်မာနိုင်ငံကို ကူညီထောက်ပံ့မည့် စီမံချက်များ၊ ကချင်၊ ကရင်ကဲ့သို့ တိုင်းရင်းသား လက်နက်ကိုင် တပ်ဖွဲ့များနေထိုင်ရာ ဒေသများကို ကူညီမည့် အကြောင်းအရာများနှင့် စပ်လျဉ်း၍ The Voice Weekly က ဘားအံမြို့ တွင် နီပွန်ဖောင်ဒေးရှင်း ဥက္ကဋ္ဌ မြန်မာ တိုင်းရင်းသား များ၏ လူမှုဖူလုံရေး ဆိုင်ရာ ဂျပန်နိုင်ငံ၏ ချစ်ကြည်ရေး သံအမတ်ကြီး ယိုဟေးအီဆာဆာကာဝါနှင့် တွေ့ဆုံ မေးမြန်းထားသည် များကို ကောက်နုတ် ဖော်ပြလိုက်သည်။

Voice : နီပွန်ဖောင်ဒေးရှင်းက နိုင်ငံ ၁၀၀ ကျော်လောက်ကို ကူညီနေတာ ဆိုတော့ မြန်မာနိုင်ငံကို အရင်ကထက် ကူညီမှုတွေ ပိုပေးဖို့ရှိလား။

နီပွန်ဥက္ကဋ္ဌ : အခု နိုင်ငံတကာကနေ မြန်မာနိုင်ငံကို ထောက်ပံ့မှုတွေကို လေ့လာ ကြည့်မယ် ဆိုရင် ၂ဝ၁ဝ ထက် ၂ဝ၁၂ ကကူညီမှုတွေ ပိုများလာတာကို တွေ့ရမှာပါ။ အထူးသဖြင့် ဂျပန်နိုင်ငံ က ထောက်ပံ့မှုတွေ ပိုများလာမှာပါ။

Voice : အဲဒီလို ကူညီတဲ့အခါ စစ်ပွဲကြောင့် ဒုက္ခ ရောက်ခဲ့ရတဲ့ တိုင်းရင်းသားတွေကို ကူညီဖို့ရှိလား။ ဥပမာ - ကချင်ပြည်နယ်လို မျိုးပေါ့။

နီပွန်ဥက္ကဋ္ဌ : ရှေ့ဆက်လုပ်မယ့် Project အနေနဲ့ ၂၀ လောက်ရှိပါတယ်။ လက်နက်ကိုင် စစ်ပွဲတွေနဲ့ မငြိမ်းချမ်း သေးတဲ့ နေရာတွေအားလုံးကို သွားပြီး တော့ အကုန်လုံးကို ထောက်ပံ့ဖို့ ကူညီ သွားဖို့ ရှိပါတယ်။

Voice : နီပွန်ဖောင်ဒေးရှင်းက အဖွဲ့အစည်း ၂၀ ကျော်နဲ့ လက်တွဲ လုပ်ဆောင်နေတာ ဆိုတော့ မြန်မာနိုင်ငံ ရဲ့ ဘယ်လို ကဏ္ဍတွေကို အဓိက ထောက်ပံ့ ကူညီဖို့ရှိလဲ။

နီပွန်ဥက္ကဋ္ဌ : ပညာရေး၊ ဆေးဝါး အကူအညီနဲ့ စိုက်ပျိုးရေး လုပ်ငန်းတွေ ကို အထောက်အကူ ဖြစ်စေမယ့် နည်းလမ်းတွေကို ကူညီမှာပါ။ ပမာဏအနေ နဲ့ အမေရိကန်ဒေါ်လာ သန်း ၂၀ လောက် မှန်းထားတယ်။ နိုင်ငံတကာ ကနေလည်း မြန်မာနိုင်ငံကို ကူညီအောင် ဂျပန် ပြန်ရောက်တာနဲ့ အားလုံးကိုပြော ပြပေးမှာပါ။ ပြောပြဖို့လည်း တာဝန်ရှိ ပါတယ်။ နိုင်ငံတကာ ကနေ မြန်မာပြည် ကို ဒီမိုကရေစီ လမ်းကြောင်းကို လျှောက်ပါ ဆိုပြီး အားလုံးက တွန်းအား ပေးခဲ့ကြတယ်။ မြန်မာပြည်က အဲ့ဒီ လမ်းကြောင်းကို လျှောက်တဲ့ အတွက် တစ်ကမ္ဘာလုံးမှာ ကူညီဖို့ တာဝန်ရှိပါ တယ်လို့ ထင်ပါတယ်။

Voice : တခြားနိုင်ငံ တွေနဲ့ နှိုင်းယှဉ်ရင် မြန်မာနိုင်ငံကို ကူညီရတာ အဆင်ပြေလား။ ဘယ်လို အခက်အခဲ တွေကြုံသေးလဲ။

နီပွန်ဥက္ကဋ္ဌ : လွတ်လပ်ပါတယ်။ ဒါပေမဲ့ ကချင်ပြည်နယ် အတွက်ကျတော့ ထောက်ပံ့ဖို့ကို ခွင့်ပြုချက် တောင်းနေရတယ်။ ခုထိတော့ ခွင့်ပြုချက်မရ သေးဘူး။ ကချင်ကို လှူဖို့ ပစ္စည်းတွေ လည်း အဆင်သင့် လုပ်ထားပါတယ်။ ခွင့်ပြုချက် ရတာနဲ့ စတင် ကူညီဖို့ အစီအစဉ် ရှိပါတယ်။ အခုကြားတာက ကချင်ပြည်နယ်မှာ ဒုက္ခရောက်နေတဲ့ စစ်ပြေး ဒုက္ခသည်ဟာ စားဖို့ မရှိဘူး။ အဓိက သူတို့စားသောက်ဖို့ အရင်ကူညီ မယ်။ စားသောက်စရာတွေ အရင်ဦးဆုံး ထောက်ပံ့ပြီးတော့ အဆင်ပြေသွားမှ သူတို့အတွက် တခြား လိုအပ်တာတွေ ဆက်လက် ကူညီပေးဖို့ စီစဉ်သွားမှာပါ။
“အဲဒီ အချိန်မှာသာ မြန်မာပြည်က ဆန်မရခဲ့ရင် ခု ကျွန်တော်ဆိုတာ ရှိမှာ မဟုတ်ပါဘူး”
 
Voice : နိုင်ငံတကာမှာ မြန်မာလိုပဲ အကူအညီ လိုအပ်နေတဲ့ နိုင်ငံတွေ အများကြီး ထဲကမှ ဂျပန်နီပွန် ဥက္ကဋ္ဌကြီး အနေနဲ့ မြန်မာကို ဘာကြောင့် အကူအညီ ပေးတာလဲ။

နီပွန်ဥက္ကဋ္ဌ : စောစောက ပြောခဲ့သလို မြန်မာပြည်က ဒီမိုကရေစီ လမ်းကြောင်း ကို စတင်ပြီး လျှောက်နေတဲ့ အချိန်အခါ မှာ အားပေးဖို့အတွက် အားလုံးမှာ တာဝန်ရှိပါတယ်။ ဒါကြောင့် မြန်မာ ပြည်ကို ရွေးချယ်တာ အကူအညီ ပေးနေတာဖြစ်ပါတယ်။ ပြီးတော့ မြန်မာလူမျိုး နဲ့ ဂျပန် လူမျိုးမှာ တူညီတဲ့ အချက်တွေ အများကြီးရှိပါတယ်။ ဥပမာ-မြန်မာ လူမျိုးတွေက တစ်ဖက်သားကို ကြင်နာ တတ်တယ်။ သဘောကောင်းတယ်။ ဂျပန်လူမျိုးတွေ မှာလည်း အဲဒီလို မျိုးစိတ် ရှိတယ်။ ဒါကြောင့် မြန်မာ လူမျိုးတွေကို ဂျပန် လူမျိုးတွေက သဘောကျပါတယ်။ ကြိုက်နှစ်သက်ပါတယ်။ ကျွန်တော် ငယ်စဉ် တုန်းက ဂျပန်ပြည်မှာ အစားအသောက် အတွက် ဒုက္ခတော်တော် ရောက်နေတဲ့ အချိန်မှာ ကမ္ဘာကပို့တဲ့ အကူအညီတွေထဲက မြန်မာပြည်ကဆန် ကို စားခဲ့ရပါတယ်။ အဲဒီအချိန် မှာသာ မြန်မာပြည်က ဆန် မရခဲ့ရင် ခု ကျွန်တော် ဆိုတာ ရှိမှာ မဟုတ်ပါဘူး။

Voice : စောစောက စိုက်ပျိုးရေး အတွက် ကူညီမယ်လို့ ပြောထား တော့ မြန်မာ့လယ်ယာ ကဏ္ဍကို ဘယ်လိုမြင်လဲ။

နီပွန်ဥက္ကဋ္ဌ : တစ်ကမ္ဘာလုံးနဲ့ ယှဉ်လိုက် ရင် နောက်ပိုင်း စားနပ်ရိက္ခာ နည်းပါး တဲ့ အနေအထားတွေ ဖြစ်လာလိမ့်မယ်။ မြန်မာနိုင်ငံက စိုက်ပျိုးနိုင်တဲ့ အနေအထား ရှိတယ်။ အဲဒီတော့ အရေးပါလာ မှာပါ။ မြန်မာပြည်မှာ အဲဒါကြောင့်မို့ စိုက်ပျိုးမှုတွေ ပြည်ပ ပို့ကုန်တွေက အရေးကြီးတဲ့ အခန်းကဏ္ဍ ဖြစ်လာမှာ ပါ။ ဒါပေမဲ့ မြန်မာလူမျိုး တွေကို ဆန်ကိစ္စနဲ့ ပတ်သက်ပြီး ပြောချင်တာတော့ ရှိတယ်။ ဒီနေ့ ကရင်ပြည်နယ်က ရွာတွေ မှာ ဆန်ဝေမယ် ဆိုပြီး ဆန်တွေကို အားလုံး ခင်းလိုက်တယ်။ အားလုံးလည်း တွေ့ပါတယ်။ ဖိနပ်ကြီးတွေနဲ့ တက်လာတာကို မြင်တော့ အရမ်းကိုတုန်လှုပ် သွားပါတယ်။ ကျွန်တော်တို့ ငယ်ငယ် တုန်းကဆိုရင် ဆန်ဆိုတာ လယ်သမား တွေ၊ ယာသမားတွေရဲ့ ချွေးနှဲစာနဲ့ လုပ်ထားတာ ဖြစ်လို့ ဆန်ကို တစ်စေ့မကျန် အလေးထားပြီး စားပါတယ်။ မြန်မာ လူမျိုးတွေ ကိုလည်း အဲဒီလို ဖြစ်စေချင်ပါ တယ်။ အလေးထား စေချင်ပါတယ်။
ယိုဟေးအီဆာဆာကာဝါ၏ ကိုယ်ရေးအကျဉ်း

- ၁၉၃၉ ခုနှစ် ဇန်နဝါရီလ ၈ ရက်နေ့တွင် ဖွားမြင်ခဲ့။
- ကမ္ဘာ့ကျန်းမာရေး အဖွဲ့၏ အရေပြားရောဂါ ပပျောက်ရေး အထူး ကိုယ်စားလှယ်နှင့် ဂျပန်နိုင်ငံရှိ အရေပြား ရောဂါသည်များ၏ အခွင့်အရေး အတွက် ကြိုးစား ဆောင်ရွက်ပေးနေသော အထူးသံတမန် တို့အပြင် မြန်မာနိုင်ငံ တိုင်းရင်းသားများ၏ လူမှု ဖူလုံရေးဆိုင်ရာ ဂျပန်နိုင်ငံ ဆိုင်ရာ ချစ်ကြည်ရေး သံအမတ်ကြီး အဖြစ်လည်း အသီးသီး တာဝန် ထမ်းဆောင်လျက်ရှိ။
- နီပွန်ဖောင်ဒေးရှင်းတွင် ၁၉၈၉ ခုနှစ်မှစ၍ ဥက္ကဋ္ဌ အဖြစ် တာဝန် ထမ်းဆောင်ခဲ့။
- Meiji တက္ကသိုလ်မှ နိုင်ငံရေးသိပ္ပံနှင့် နိုင်ငံရေးဘောဂဗေဒ ဘာသာရပ် တို့ဖြင့် အောင်မြင်ခဲ့။
- နီပွန် ဖောင်ဒေးရှင်းသည် မြန်မာနိုင်ငံသို့ ၁၉၇၆ ခုနှစ်ကပင် လူ့စွမ်းအား အရင်းအမြစ် ဖွံ့ဖြိုးရေး ဆိုင်ရာ အစီအစဉ်များ၊ အနာကြီးရောဂါ ဆေးဝါးများ အခမဲ့ဖြန့်ချိမှု အစီအစဉ် များဖြင့် ဝင်ရောက် လာခဲ့ခြင်းဖြစ်။

(ဇေနွေထွန်း)
Copy from - thevoicemyanmar

0 comments: