Thursday, December 6, 2012

အမြန်လာရောက်တောင်းပန်ရန် အိမ်တော်ရာထိုင်သပိတ်၌ ဆရာတော်မိန့်ကြား

ရုပ်သံ - ဒီဗွီဘီ တီဗီ


နိုင်ငံတော်သမ္မတနှင့်အစိုးရအဖွဲ့များမှ ထိခိုက်ဒဏ်ရာရရှိသော သံဃာများအား အမြန်ဆုံးလာရောက် ၀န်ချတောင်းပန်ရမည်ဟု ဘ၀အလင်းကျောင်းတိုက်မှ ဆရာတော်ဦးဥတ္တမစာရက မိန့်ကြားလိုက်သည်။

မန္တလေးမြို့ ချမ်းအေးသာစံမြို့နယ်အတွင်းရှိ အိမ်တော်ရာဘုရား၌ တစ်နာရီခွဲကြာပြုလုပ်ခဲ့သည့် ထိုင်သပိတ်တွင် ဆရာတော်က မိန့်ကြားခဲ့ခြင်းဖြစ်သည်။

“အခုချိန်ထိ နိုင်ငံတော်အစိုးရ လူကြီးတစ်ယောက်အနေနဲ့လာသွားတာ တစ်ယောက်မှမရှိသေးဘူး ၊ ” ဟု ဆရာတော်မှ ထိုင်သပိတ်ကျင်းပသည့် နေရာတွင် သံဃာတော်များအား မိန့်ကြား သည်။

မုံရွာမြို့တွင်ပြုလုပ်ခဲ့သည့် သက်ဆိုင်ရာမှသံဃာအချို့အား ၀န်ချတောင်းပန်မှုကို အသိအမှတ် မပြုကြောင်း ၊ ထိုတောင်းပန်သည့်သူများမှာလည်း ပစ်ခတ်မှုတွင် ပါဝင်သူများ မဟုတ်သလို အတောင်းပန်ခံသည့်
သံဃာများမှာလည်း ကာယကံရှင်များ မဟုတ်သည့်အတွက် လက်မခံနိုင် ကြောင်း ဆရာတော်က ဆက်ပြောသည်။

“အတောင်းပန်ခံတဲ့ ဘုန်းကြီးတွေကလည်း ခံရတဲ့ဘုန်းကြီးတွေ တစ်ပါးမှမပါဘူး ၊ မပါပဲနဲ့ သူတို့ အဲ့ဒီလိုလုပ် သွားတယ် ၊ အဲလိုလုပ်သွားတဲ့ဘုန်းကြီးတွေကို သံဃာ့ကိုယ်စားလှယ်လို့ မသတ်မှတ်ပါဘူး” ဟု ဆရာတော် ဦးဥတ္တမက မိန့်ကြားခဲ့သည်။

ယနေ့ပြုလုပ်သောထိုင်သပိတ်သည် ယခုလ ဒီဇင်ဘာ (၁)ရက်နေ့ကပြုလုပ်သော ထိုင်သပိတ်မှ ကျင်းပသည့် (၅)ရက်အချိန် ပေးထားမှုကို အစိုးရမှတုန့်ပြန်ခြင်း မရှိသည့်အတွက် ဆက်လက်ပြုလုပ် ခြင်းဖြစ်ပြီး နောက်ထပ်ဆက်လက်ပြု လုပ်သွားမည်ဖြစ်ကြောင်းကိုလည်း သိရသည်။

သံဃာတော်များ ထိုင်သပိတ်ကျင်းပရာ အိမ်တော်ရာဘုရားအတွင်းသို့ (၈၈)ကျောင်းသားအဖွဲ့မှ ကိုမာကီးနှင့် မစုစုနွေးတို့ လာရောက်တွေ့ဆုံမှုများပြုလုပ်ခဲ့သည်။

မြန်မာနိုင်ငံ၏အပြောင်းအလဲကို အားလုံးစောင့်ကြည့်ပြီးထိန်းမတ်နေသည့် ကာလအတွင်း သံဃာတော်များအား ယခုလိုပြုမူလိုက်ခြင်းအား စိတ်မကောင်းကြောင်း (၈၈)အဖွဲ့မှကိုမာကီးက ပြောကြားခဲ့သည်။

“သံဃာတော်တွေ တောင်းဆိုတဲ့ တရားမျှတသည့်တောင်းဆို မှုကို သက်ဆိုင်ရာအဖွဲ့အစည်း အဆင့်ဆင့်က ပြေလည်အောင်ဆောင်ရွက်ပေးဖို့ တောင်းဆိုပါတယ် ´´ ဟု ကိုမာကီးက ပြောကြားခဲ့သည်။

ယနေ့ပြုလုပ်သောထိုင်သပိတ်တွင် ကြေညာချက်ငါးချက်ကြေညာခဲ့ပြီး နိုင်ငံတော်သမ္မတနှင့် အစိုးရအဖွဲ့က ထိခိုက်ဒဏ်ရာရသံဃာတော်များကို အမြန်ဆုံးလာရောက်ဝန်ချ တောင်းပန်ရန် ၊ အကြမ်းဖက်နှိမ်နှင်းမှုတွင် တာဝန်ရှိသောသူများအား ထိရောက်စွာအရေးယူပေးရန်နှင့် ကြေးနီစီမံကိန်းနှင့်ပတ်သတ်ပြီး ဖမ်းဆီးထားသူများကို ချက်ချင်းပြန်လွှတ်ပေးရန်ဟူသော တောင်းဆိုချက်များသည် အရေးကြီးတောင်းဆိုချက်ဖြစ်ကြောင်းနှင့် ထိုအချက်များအပါအ၀င် အချက်ငါးချက်ကို ဘ၀အလင်းကျောင်းတိုက်မှ သံဃာတစ်ပါးဖြစ်သည့် ဦးသောဘိတက ကြေညာခဲ့သည်။

ထိုင်သပိတ်ကို နေ့လည် ၁နာရီတွင် စတင်ခဲ့ပြီး မွန်းလွဲနှစ်နာရီခွဲတွင် ရုတ်သိမ်းခဲ့ကာ ဒီဇင်ဘာလ (၈)ရက်နေ့နှင့် (၁၂)ရက်နေ့များတွင် ဆက်လက်ပြုလုပ်သွားမည်ဖြစ်ကြောင်းသိရသည်။
 
Copy from - Myit Makha Mediagroup


0 comments: