Wednesday, June 27, 2012

ဂျပန်မှာ (၄)

ဂျပန်မှာ (၄)
ခြင်္သေ့တို့မည်သည် သားကောင်ကို ဖမ်းဆီးရာတွင် သားကောင် အကြီးအငယ် မခွဲခြားဘဲ တူညီသော လုံ့လခွန်အားကို ပြုသကဲ့သို့ ဂျပန်လူမျိုးအများစုဟာလည်း အလုပ်တခုလုပ်တဲ့နေရာမှာ  အလုပ်ကြမ်းပဲဖြစ်ဖြစ်၊ အလုပ်ချောပဲဖြစ်ဖြစ် ဘယ်အလုပ်ကိုမှ ပေါ့ပေါ့တန်တန် လုပ်လေ့မရှိဘူး။ သူတို့ကို အလုပ်တခု အပ်လိုက်ပြီဆိုတာနဲ့ အဲသည့်အလုပ်ကို သူတို့ လုပ်နိုင်မနိုင် အရင်ဆုံး စဉ်းစားလေ့ရှိတယ်။ တော်ရုံ တန်ရုံတန်နဲ့တော့ ငြင်းလေ့ မရှိပေမယ့် တကယ် မတတ်နိုင်ရင်လည်း ပြတ်ပြတ်သားသား ငြင်းလေ့ရှိတယ်။ ကိုယ့်ကိုကိုယ် မသေချာတဲ့ အလုပ်မျိုးကို ငွေရချင်တဲ့ စိတ်တခုတည်းနဲ့ လောဘတကြီး လက်ခံလေ့မရှိဘူး။

အဲဒီလို ဆင်ခြင်နိုင်ခြင်းကြောင့် အလုပ်ကို သတ်မှတ်ချိန်မှာ သေသပ်လှပစွာ အိနြေ္ဒသိက္ခာရှိစွာနဲ့ အချိန်မီပြီးစီးခြင်း၊ သတ်မှတ်ချိန်အတိုင်း အလုပ်အပ်သူအပေါ် ကတိတည်နိုင်ခြင်းကြောင့် နောက်ထပ် အခွင့်အလန်းကောင်းများ ရနိုင်ခြင်း၊ ကိုယ့်ကိုကိုယ်လည်း ယုံကြည်မှုရှိလာခြင်း စတဲ့ အကျိုးကျေးဇူးတွေကို ခံစားရပါတယ်လို့ ကျွန်ုပ်မြင်ပါတယ်။

အလုပ်တခုကို လက်ခံလိုက်ပြီဆိုရင်လည်း လုပ်နေရင်းနဲ့ ဘယ်လို အခက်အခဲမျိုးနဲ့ပဲတွေ့တွေ့ မဖြစ်ဖြစ်အောင်၊ မရရအောင်၊ မပြီးပြီးအောင် သေကောင်ပေါင်းလဲကို ကြိုးစားပြီးလုပ်လေ့ရှိတယ်။ သူတို့ တာဝန်ယူထားတဲ့ အလုပ်တခုကို အလုပ်မပြီးသေးဘဲ လက်လျှော့လိုက်ချိန်ဟာ...
အလုပ်လုပ်နေရင်းနဲ့ ဗိုင်းကနဲ လဲကျသွားတဲ့ အချိန်၊ အလုပ်လုပ်နေရင်းနဲ့ သေသွားတဲ့အချိန်၊ ဘယ်လိုမှ မတတ်နိုင်တော့လို့ အားလုံးကို အရှူံးပေးပြီး အလုပ်က နှုတ်ထွက်သွားတဲ့ အချိန်တွေလောက်သာဖြစ်တယ်။

ဂျပန်မှာ အစိုးရအုပ်ချုပ်ရေးအပိုင်းကစလို့ အချိန်ပိုင်း အလုပ်သမားအဆင့်အထိ အလုပ်က ပြုတ်တယ်၊ ကိုယ်က မတတ်နိုင်လို့ အလုပ်က ထွက်လိုက်ရတယ်ဆိုတာဟာ သေသွားသလိုပါပဲ။ ဂျပန်စကားနဲ့တော့ (ကုဘိ)(KUBI) (首) လို့ခေါ်ပါတယ်။ ကုဘိရဲ့ မူရင်း အဓိပ္ပာယ်က လည်ပင်း ပါ။ ဒါပေမယ့် အလုပ်ပြုတ်တယ်။ အလုပ်ဖြုတ်တယ်ဆိုလည်း ကုဘိလို့ ပြောပါတယ်။ နင့်ကို ကုဘိ လုပ်လိုက်ပြီဆိုရင် ဆိုလိုတာကတော့ လည်ကိုဖြတ်လိုက်ပြီပေါ့နော်။ အလုပ်ပြုတ်ပြီပေါ့။ ငါတော့ ကုဘိ ဖြစ်လာတယ်ဆိုရင် အလုပ်ဖြုတ်ခံလာရတယ်လို့ ဆိုလိုတာပါ။ ကိုယ့်ဖာသာကိုယ် တခြားပြဿနာမရှိဘဲ ရိုးရိုးတန်းတန်း အလုပ်က ထွက်တာကိုတော့ ကုဘိလို့ မသုံးပါဘူး။

ဆိုလိုချင်တဲ့သဘောက ဂျပန်မှာ အလုပ်မရှိရင်၊ အလုပ်ပြုတ်ရင် လည်ပင်းပြတ်သလိုပါပဲ။ ဂျပန်လူမျိုးတွေ တယောက်နဲ့တယောက် ကိုယ့်ကိုကိုယ်မိတ်ဆက်ကြရင် ပြောလေ့ရှိတဲ့ မိတ်ဆက်စကားပထမဦးဆုံး အပိုဒ်တွေမှာ “ကျနော်/ကျမ ဟာ ဘယ်ကုမ္မဏီ၊ ဘယ်ဌာနက ဘယ်သူပါ” ဆိုတဲ့ သူတို့အလုပ်ကိုပါ တွဲပြီး မိတ်ဆက်လေ့ရှိကြပါတယ်။ သဘောကတော့ သူဟာ လက်ရှိ ဒီအလုပ်တွေမှာ အလုပ်လုပ်နေပါတယ် ဆိုခြင်းဟာ သူဟာ လူအများနဲ့ အတူတကွတွဲပြီး ဆက်ဆံနိုင်တဲ့ အရည်အချင်းရှိခြင်း၊ သူ့ကြိုးစားမှုကြောင့် ဒီအလုပ်မှာ လုပ်ခွင့်ရနေခြင်း၊ သူဟာ ဂျပန့်လောကမှာ အဓိပ္ပာယ်ရှိရှိ ရှင်သန်နေပါတယ် ဆိုတာကို ပြောလိုက်တဲ့သဘောပါပဲ။

ဂျပန်မှာ အလုပ်မြဲသူတယောက်နဲ့ အလုပ်မမြဲသူတယောက်၊ အလုပ်ကောင်းသူတယောက်နဲ့ အလုပ်မကောင်းသူတယောက်တို့ရဲ့ ရပိုင်ခွင့် အခွင့်အရေးတွေဟာ သိသာစွာ ကွဲပြားပါတယ်။ ဒါကြောင့် အလုပ်ဟာ သူတို့ရဲ့ အသက်သွေးကြော၊ သူတို့ရဲ့ဘဝ၊ သူတို့ရဲ့ ဂုဏ်သိက္ခာပါ။ အလုပ်မကြိုးစားတာ၊ အလုပ်တခုကို စနစ်တကျ သေသေချာချာ မလုပ်တာလောက် ရှက်ဖို့ကောင်းတာမရှိဘူးလို့လည်း ဂျပန်လူမျိုးအများစုက ခံယူထားကြပါတယ်။

အဲဒီလို လူမျိုးကို (GANBARANAI HITO) (ဂန်ဘရနိုင်း ဟိတို) (ဂန်ဘရနိုင်း ရှိတို) (頑張らない人)လို့ ခေါ်ပါတယ်။ “သူလား အလကားပါဟာ  (GANBARANAI HITO) ပါ “ လို့ ဆိုလိုက်ရင် အလုပ်ကြိုးစားတဲ့ နိုင်ငံခြားသားလောက်တောင် အရေးပေးခြင်း မခံရတော့ပါဘူး။ အဲလို လူမျိုးဟာ အလုပ်ခွင် တနေရာထဲမှာသာမကဘဲ တခြားနေရာတွေမှာလည်း ယုံကြည်စိတ်ချခြင်း ခံရလေ့မရှိတော့ဘူး။ ကြာလာရင် အဲလို လူမျိုးဟာ အထီးကျန် လာတတ်ကြတယ်။ ဆိုးကျိုးတွေ အနေနဲ့ကတော့ တခန်းလွတ် ၂ခန်းလွတ် အနေအထားနဲ့ ခပ်ကြောင်ကြောင်ဖြစ်လာခြင်း၊ သူ့စကားကို သူများတွေက အလေးမထားတော့ခြင်း၊ သူတပါး ခိုင်းဖတ်ဖြစ်လာခြင်းနဲ့ သိပ်ဆိုးရွားလာပြီဆိုရင် Homelessဖြစ်သွားခြင်းပါပဲ။

ဂျပန်နိုင်မှာ Homeless ဖြစ်သွားသူတွေရဲ့ ဘဝဖြစ်စဉ်တွေကို လိုက်လံစုံစမ်းမှတ်တမ်းတင်ပြီး ပြန်လည်ဖေါ်ပြတဲ့ TV အစီအစဉ်တွေမှာ homelessဖြစ်သွားသူများရဲ့ ၇၀ရာခိုင်နှုန်းဟာ အလုပ်နဲ့တိုက်ရိုက်ပါတ်သက်နေတဲ့ ကိစ္စတွေကြောင့်ပဲ ဖြစ်ပါတယ်။(မှတ်ချက်...အလုပ်နဲ့တိုက်ရိုက်ပါတ်သက်နေတဲ့ ကိစ္စဆိုသည်မှာ အလုပ်မကြိုးစားလို့ home less ဖြစ်ရတင်မဟုတ်ဘဲ၊ အလုပ်ကြိုးစားပါရက်နဲ့ အလုပ်ခွင်တွင်း တခြားသော ပြဿနာများကြောင့် Home lessဖြစ်ရခြင်းမျိုးတွေပါ ဆိုလိုပါတယ်။)။ ဒါကြောင့် ဂျပန်လူမျိုးတွေဟာ အလုပ်ကို အရမ်းတန်ဖိုးထားသလို၊ အရမ်းလည်း ကြိုးစားပါတယ်။

“နေ့မအား ညမနား” ဆိုတဲ့ စကားဟာ ဂျပန်လူမျိုးတွေအတွက်တော့ မြန်မာပြည်မှာလို ဆိုင်းဘုတ်ထောင်စရာမလို၊ ရုပ်မြင်သံကြားက ကြေငြာသတိသတိပေးစရာမလိုဘဲ သူတို့ရင်တွင်းမှာ စိုက်ထူထားတဲ့ ပိုစတာတခုပါပဲ။
အဲဒီလောက် အလုပ်ကို တန်ဖိုးထား၊ အလုပ်ကို ကြိုးစားလွန်းတဲ့ ဂျပန်လူမျိုးတွေ ကြားမှာ သင်ဟာ “မရှိလို့ လုပ်စားတာ အေးဆေးပေါ့ “ ဆိုတဲ့ စိတ်ဓါတ်ရှိတယ်ဆိုရင် ဂျပန်ကိုမလာတာ အကောင်းဆုံးပဲလို့ စေတနာနဲ့ အကြံပေးလိုက်ပါရစေ။
သင့်အတွက် ဂျပန်ဟာ ငရဲတွင်းလိုပဲ ဖြစ်နေပါလိမ့်မယ်။

“အလုပ်ခွင်ထဲမှာ နားချိန်မဟုတ်လည်း ပင်ပန်းလာရင်တော့ လူပဲ နားချင်တာပေါ့၊ ဘာလို့ဒီလောက်တောင် လုပ်ရမှာလဲ၊ မြန်မာပြည်မှာဆို အဲလောက်မလိုပါဘူး၊ အရေးမပါဘူး” ..စသဖြင့် ရေသာခိုချင်တဲ့ စိတ်ဓါတ်မျိုးရှိရင်လည်း ဂျပန်မှာ အလုပ်လုပ်ပြီး စီးပွားရှာရတာဟာ သင့်အတွက် ငရဲတွင်းကို နေ့တိုင်းဆင်းနေရသလို ဖြစ်နေပါလိမ့်မယ်။ ကြာလာရင် ဂျပန်သံတွေမကြားချင်တော့သလို၊ လမ်းပေါ်မှာ၊ ရထားပေါ်မှာ မြင်မြင်သမျှ ဂျပန်တွေကို ပြေးရိုက်ချင်စိတ်တွေ ပေါ်လာပါလိမ့်မယ်။

ကဲ…လူကြီးမင်း ဂျပန်မှာ အလုပ်လုပ်ပြီး ပိုက်ဆံရှာဖို့ သေချာစဉ်းစားလိုက်ပါဦး။ နောက်တခေါက်မှာတော့ ဂျပန်လူမျိုးတွေလို အလုပ်ကြိုးစားပါရက်နဲ့၊ အလုပ်လုပ်ချင်စိတ်ရှိပါရက်နဲ့ ဂျပန်မှာ အလုပ်လာလုပ်ကြတဲ့ မြန်မာနိုင်ငံသားတွေအပါအဝင် တခြားနိုင်ငံခြားသားတွေ အတော်များများ ရင်ဆိုင်ကြုံတွေ့နေကြရတဲ့ အလုပ်ခွင်ထဲက ပြဿနာများကို ရေးသားပါဦးမယ်။

နန္ဒာ(ဂျပန်)

ဂျပန်မှာ(၄) အတွက် ကျမ်းကိုးစာရင်း
ဂျပန်လူမျိုးတို့၏ လျှို့ဝှက်ချက်များ(ဥာဏ်လင်းတင့်)
http://en.wikipedia.org /wiki/Homelessness_in_Japan

ဂျပန်မှာ (၃)ကို ဖတ်ရန် ဒီနေရာကို နှိပ်ပါ။
ဂျပန်မှာ (၂)ကို ဖတ်ရန် ဒီနေရာကို နှိပ်ပါ။
ဂျပန်မှာ (၁)ကို ဖတ်ရန် ဒီနေရာကို နှိပ်ပါ။

0 comments: