Friday, February 24, 2012

ယမန်နေ့မှ ကနေ့အထိ မြန်မာအစိုးရတပ် နှင့် သျှမ်းပြည် တပ်မတော် အပြန်အလှန် ဝန်းရံ တိုက်ခိုက်နေ

သျှမ်းပြည်တပ်မတော် RCSS/SSA
“ မနေ့ ညနေပိုင်း ၃ နာရီ ကတည်းက အင်အား ၁၅၀ နဲ့ ၁၈၀ ကြား လောက်ရှိတဲ့ ခလရ ၂၂၁ နဲ့ ခမရ ၅၇၀ ပူးပေါင်း တပ်က ကျနော်တို့ တပ်နောက်ကို ကပ်လိုက် လာတယ်။ ကျနော်တို့လဲ ရွှေ့ပေးရင်းရွှေ့ပေးရင်း တာချီလိတ် အရှေ့မြောက်ဖက် က နောင်ကန် တောင်ကြောနဲ့ မိုင်းဟိုင်း ကြားလဲ ရောက်ရော ပြန်ပြီး ခုခံတိုက် ခိုက်တာဖြစ်တယ်။ ဒီနေ့ညနေပိုင်းအထိ ကျနော် တို့ဖက်က မြန်မာ ပူးပေါင်းစစ်တပ်ကို ဝိုင်းထားတုန်းဘဲ” သျှမ်းပြည် တပ်မတော် ကျိုင်းတုံ စစ်ဒေသမှ အဆိုပါ တပ်မှူးကြီး ကပြောသည်။

အဆိုပါ မြန်မာ ပူးပေါင်း စစ်တပ်အား သျှမ်းပြည် တပ်မတော်မှ နယ်မြေခံ လှုပ်ရှားရေးအဖွဲ့ တပ်ရင်း ၃၄ နှင့် ပူးပေါင်းကာ ပြန်လည် တိုက်ခိုက်ခြင်း ဖြစ်ကြောင်း၊ ယခုတိုက်ပွဲ ဖြစ်ပွါးသည့်နေရာမှာ တာချီလိတ်မြို့အနောက် မြောက်ဘက် ၂၅ ကီလို မီတာခန့် အကွာ၊ SSA ၏ ကျိုင်းတုံ စစ်ဒေသ လွယ်ကော်ဝမ်း တပ်စခန်း မြောက်ဖက် ၃၀ ကီလိုမီတာခန့် အကွာတွင် တည်ရှိ ကြောင်းလည်း အဆိုပါ တပ်မှူးက ဆက်လက် ပြောပြသည်။

“ ဒီနေ့ ညနေ ၃ နာရီလောက်မှာ ကျနော်တို့ ဝိုင်းထားတဲ့ မြန်မာစစ်ကြောင်းရဲ့ ဗျူဟာမှူး အဆင့်ပါ ရုံးအဖွဲ့ကို ဝင်တိုက် မိတယ်။ ဘယ်သူ ဘာဖြစ်လဲဆိုတာတော့ အသေးစိတ် မသိရသေးဘူး။
သူတို့ရုံး အဖွဲ့ကွဲသွားပြီ။ အကျအဆုံးလဲ မသိရသေး ဘူး” ဟု အဆိုပါ တပ်မှူးက ဆက်လက်ပြောပြသည်။

ယခုအပတ် (၁၈-၁၉ ရက်နေ့)က  တာချီလိတ်မြို့နယ် မိုင်းဟိုင်း အုပ်စု ဖက်လှုပ်ရှားနေသည့် သျှမ်းပြည်တပ်မ တော်  RCSS/SSA တပ်ဖွဲ့အား ထိုင်းနယ်စပ်ရှိ ဌာနချုပ် တပ်စခန်းများ တည်ရှိရာ လွယ်ကော်ဝမ်း၊ မယ့်မော့ ဖက် ပြောင်းရွှေ့ လှုပ်ရှားရန်  မြန်မာအစိုးရ စစ်တပ် ဗိုလ်မှူး မင်းဇော်ထွန်း ဦးဆောင်သည့် ခလရ ၂၂၁ နှင့် ဒု-ဗိုလ်မှူးကြီး ထိန်ဝင်းအောင် ဦးဆောင်သည့်  ခမရ ၅၇၀ တို့က  ပူးပေါင်း ဖိအားပေးလာရာ ၃ ကြိမ်ထက်မနည်း တိုက်ပွဲ ဖြစ်ပွါးခဲ့သည်။

သျှမ်းပြည် တပ်မတော်နှင့် မြန်မာအစိုးရတို့ အပစ်ရပ်ရေး ဆွေးနွေးပြီးနောက်ပိုင်း ယနေ့အပါအဝင် တိုက်ပွဲ အပြင်းအထန် ၁၁ ကြိမ်ထက် မနည်း ဖြစ်ပွါးခဲ့ပါသည်။

သတင်းရင်းမြစ် - သျှမ်းသံတော်ဆင့်

0 comments: