Saturday, September 17, 2011

အစိုးရစစ်ကြောင်း ပိတ်ဆို့ခံနေရဟု KIA ကပြော



“အခုလ(၁၄) ရက်နေ့က စဖြစ်တာ မနေ့ကလည်း ဖြစ်တယ်။ ဒီနေ့ မနက်လည်း မပြီးနိုင်သေးဘူးဗျ။ ဖြစ်တုန်းလို့ ပြောတယ်။ သူတို့အဖွဲ့ကတော့ တောထဲမှာ နေပြီးတော့ ဟိုဖက် ပြောင်းလိုက် ဒီဖက်ပြောင်းလိုက်နဲ့ လုပ်နေကြတယ်။ အခုဟာက သူတို့ရဲ့ ထွက်ပေါက်ကို ပိတ်ပြီး လိုက်ပြီးတော့ ရှင်းလင်းတဲ့ အဆင့်ရောက်နေတယ်။ ကားလမ်းပေါ် မတက်နိုင်အောင် လုပ်ထားတာပေ့ါ။”

အစိုးရ၏ ခြေလျင်တပ်ရင်း ခလရ(၃၇)၊ ခလရ(၂၉) နှင့် ခြေမြန်တပ်ရင်း ခမရ (၄၃၈) တပ်ရင်း သုံးရင်းမှ အင်အား (၈၀) ကျော်ခန့်ပါဝင်သည့် စစ်ကြောင်း အား KIA တပ်မဟာ(၅) လက်အောက်ခံ တပ်ရင်း (၁၈) ကတိုက်ခိုက်နေခြင်း ဖြစ်သည်။

ယခုတိုက်ပွဲဖြစ်ပွားနေသည့် ခလားယန် ကျေးရွာသည် KIO ဗဟို ဌာနချုပ် အခြေစိုက်ရာ လိုင်ဇာမြို့နှင့် (၁၅) မိုင်ခန့်အကွာတွင် တည်ရှိပြီး ၀ိုင်းမော်မြို့နယ်အတွင်း ပါဝင်သည်။

ယင်းစစ်ကြောင်းအား ခလရ (၃၇) မှ ဗိုလ်မှူး မင်းမောင်မောင် ဦးဆောင်၍ အင်အား (၁၅၀) ခန့် ဖြင့် အစိုးရ၏ နားဖော့ တပ်စခန်းသို့ ရိက္ခာပို့ရန်နှင့် လမ်းလုံခြုံရေး ယူရန် ယခုလ (၈) ရက်နေ့က သွားရောက်ခဲ့ပြီး အပြန်တွင် တိုက်ခိုက် ခံခဲ့ရခြင်းဖြစ်သည်။


ထို့အပြင် ယခုလ (၁၁) ရက်နေ့နှင့် (၁၃) ရက်နေ့များကလည်း KIA တပ်ဖွဲ့၏ ခြုံခိုတိုက်ခိုက်ခြင်း ခံခဲ့ရပြီး အရာရှိ နှစ်ဦး အပါအ၀င် ရဲဘော် အများအပြား ဒဏ်ရာ ရရှိခဲ့သည်ဟု ဦးလနန်က ပြောသည်။ သို့သော် ယင်းကိစ္စ သီးခြား အတည်ပြုချက် မရသေးပါ။

နားဖော့တပ်စခန်းသည် ၁၉၈၇ ခုနှစ် ဗိုလ်ချုပ်ကြီးနေ၀င်း လက်ထက်က အစိုးရတပ်မှ ထိုးစစ်ဆင် တိုက်ခိုက်ခဲ့သည့် KIO စစ်ဦးစီးဌာနချုပ်စခန်းဖြစ်ပြီး ယခုအခါ စစ်ရေးအရ အချက်အခြာကျသည့် စခန်းဖြစ်သည်ဟု ၎င်းက ဆက်ပြောသည်။

“အဲဒီနားဖော့ စခန်းက ဒီပါဂျောင်ဒေသမှာ တောင်ကလည်း တော်တော်မြင့်တယ်လေ။ နောက်ပြီး တော့ သူတို့ရဲ့ မဟာဗျူဟာ အရလည်း အချက်အခြာ ကျတယ်။ ဒါကြောင့် ဒီနားဖော့ စခန်းက ကျနော်တို့ရဲ့ ဗဟိုကို ထိန်းချုပ်ဖို့အတွက် အခြေခံအကျဆုံး ရှေ့တန်း စခန်းလို့ ပြောလို့ရတယ်။”

ပါဂျောင်ဒေသသည် ၁၉၉၄ ခုနှစ် စစ်အစိုးရနှင့် အပစ်အခတ်မရပ်စဲမီက KIO ဌာနချုပ်ဟောင်း အခြေစိုက်ရာ ဒေသဖြစ်ပြီး လက်ရှိတွင်လည်း ဌာနချုပ်အဖြစ် ဆက်လက် အသုံးပြုနေဆဲ ဖြစ်သည်။

ယခုလ (၁၄) ရက်နှင့် (၁၅) ရက်နေ့များကလည်း တာပိန်ရေအား လျပ်စစ်စက်ရုံတည်ရှိရာ KIA တပ်မဟာ(၃) ထိန်းချုပ်ဒေသတ၀ိုက်တွင်လည်း တိုက်ပွဲများ ဖြစ်ပွားနေသည်ဟု သိရသည်။
သြဂုတ်လ (၁၈) ရက်နေ့က ပြည်ထောင်စု အစိုးရအဖွဲ့၏ ငြိမ်းချမ်းရေး ထုတ်ပြန် ကြေငြာချက်တွင် ၂၀၀၈ ခုနှစ် အခြေခံ ဥပဒေအရသာ ဆွေးနွေးမှု ပြုလုပ်မည်ဟု ဖော်ပြထားသည့်အပေါ် KIO အဖွဲ့ က လက်မခံ ငြင်းဆန်ထားသည်။

လောလောဆယ်တွင် အစိုးရ၏ ပြည်နယ်တည်ငြိမ်အေးချမ်းမှုညှိနှိုင်းရေး အဖွဲ့နှင့် KIO ကိုယ်စားလှယ် အဖွဲ့တို့၏ တွေ့ဆုံဆွေးနွေးရေး လုပ်ငန်းစဉ်လည်း ရပ်ဆိုင်းနေသည်။

KIO သည် ၁၉၉၄ ခုနှစ်က စတင်၍ စစ်အစိုးရနှင့် (၁၇)နှစ်ကြာ အပစ်အခတ်ရပ်စဲခဲ့ပြီး လွန်ခဲ့သည့် ဇွန်လ(၉) ရက်နေ့မှ စတင်၍ တာပိန် ရေအား လျပ်စစ် စီမံကိန်း အကြောင်းပြချက်ဖြင့် တိုက်ပွဲများ ပြန်လည် ဖြစ်ပွားလာခဲ့သည်။

သတင်းရင်းမြစ် - သတင်းနှင့်မီဒီယာ ကွန်ယက်။

0 comments: