Sunday, September 25, 2011

ဒို့အရေး........ကဗျာ

*** ဒို့အရေးတွေဟစ်ကြွေးပြီး မြစ်ဧရာကိုကယ်တင်ကြပါစို့ ***
 
တရုတ်- မြန်မာ ခေါင်းဆောင်ကြီးတွေရဲ့
အောင်သေအောင်သားစားတဲ့ ဆွေနွေးပွဲတခုမှာ
နင့်ကိုတည်ခင်း ဟင်းရွက်ကဇွန်းလို ရောင်းစားလိုက်တော့
ငါတကယ် အံ့သြမိတယ်...မြစ်ဧရာ၊
မဟုတ်ပါစေနဲ့ မဖြစ်ပါစေနဲ့
ငါအကြိမ်ကြိမ်ဆုတောင်း မိတယ်
ဖွ- ဟဲ့ ဒီသတင်းလွဲမှားပါစေ....မြစ်ဧရာ။
 
ငါ့ဆုတောင်းမပြည့်ပါဘူး
ရာဇဝင်များရဲ့ အရှင် ရာဇဝင်တို့ရဲ့သ္ခင်
အို....ဧရာဝတီ
အစဉ်အမြဲ တသွင်သွင်စီးဆင်းနေတဲ့
နင့်ရဲ့ဘဝ နင့်ရဲ့အလှကို နင်းချေဖျက်ဆီးပစ်ဖို့
အမျိုးယုတ်သူတွေဟာ လက်ဝါးချင်းရိုက်ပြီ
ဖြစ်ဆုံထက်မှာ လုပ်ငန်းတွေစတင်ဖို့ တာစူနေပြီ...ဧရာဝတီ။
 
ဝမ်ကျားပေါင်လား ကြက်ပေါင်လား ငါမသိ
တရုတ်ကွန်မြစ်ရဲ့ခေါင်းဆောင် ဟူကျင်တောင်နဲ့အပေါင်းပါ
အာဏာရှင်မှန်သမျှသူ ဖေးကူ
ကိုယ့်နိူင်ငံကထွက်တာ အကုန်သိမ်းယူ၊
ဂုတ်သွေးလည်းစုတ် ရှုပ်ထွေးနေတဲ့
တရုတ်ကွန်မြူနစ်ရဲ့ လမ်းစဉ်
ဘယ်သူတွေဘာဖြစ်ဖြစ် ဘာအရေးလဲ...ဆိုတဲ့
ခပ်- ညညစိတ်ဓါတ်
တရုတ်ကွန်မြူနစ်ခေါင်းဆောင်တွေဆီမှာ အပြည့်ရှိတယ်။
 
တချိန်က  တရုတ်မြန်မာ အဓိကရုဏ်း
တရုတ်ဆန်ပြုတ် တို့မတုတ်
တရုတ်ဆီးပြားတို့ မစား
တရုတ်ပစ္စည်းတွေ မဝယ်ယူဖို့ အရေး
တရုတ်ဆန့်ကျင်ရေး အသံတွေကိုလည်း
ခုချိန်ခါမှာ တို့ပြည်သူတွေ ကြွေးကျော်ရမယ်။
 
လူ့အသိစိတ်ပျောက်ပြီး
လောဘရမ္မက် ဇွတ်ဖက်နေတဲ့ အာဏာရှူးတွေဟာ
ဖြုတ်ဦးနှောက်နဲ့ တိုင်းပြည်ကိုအုပ်ချုပ်
အာဏာတည်မြဲရေးအတွက်ဆို လက်ညိုးတွေထိုးထိုးပြီး
တိုင်းပြည်ကို ပေါင်နှံရောင်းစားလုပ်နေတယ်...ဧရာဝတီ။
 
ဒီအတွက်....ဧရာဝတီကိုကယ်တင်ဖို့
ငါတို့အားလုံးသွေးစည်းရမယ် ငါတို့အားလုံးညီညွှတ်ရမယ်၊
ဒါတို့တိုင်းတို့ပြည် တို့ပိုင်တဲ့မြေထဲ
တို့တတွေရဲ့ ဆန္ဒတွေမပါပဲ
အကောင်ထည်ဖော်နေတာမှန်သမျှ ရပ်တန့်ပစ်ဖို့
ဒို့- အရေးတွေ ဟစ်ကြွေးပြီး မြစ်ဧရာကို ကယ်တင်ကြပါ....စို့။
 
(အမေ့သား) ဒိန်းမတ်
အင်တာနက် စာမျက်နာမှ ကူးယူခဲ့ပါသည်.....
 

0 comments: