Tuesday, July 19, 2011

မလေးရှားတွင် မွန်နိုင်ငံရေး အကျဉ်းသားများ လွတ်မြောက်ရေး ဆုတောင်းပွဲ ကျင်းပ

မလေးရှားတွင်မွန်နိုင်ငံရေးအကျဉ်းသားများလွတ်မြောက်ရေးဆုတောင်းပွဲကျင်းပနေပုံ
( ဓာတ်ပုံ - လွတ်လပ်သော မွန်သတင်းအေဂျင်စီ)
July 18th, 2011

အကျဉ်းကျခံနေရဆဲ မွန်နိုင်ငံရေး အကျဉ်းသားများ လွတ်မြောက်ရေး ဆုတောင်းပွဲနှင့် ရဟန်း သံဃာတော်များအား ဆွမ်းအလှူ ကျွေးပွဲတရပ်ကို မလေးရှားနိုင်ငံရောက် မွန်အမျိုးသားများ ယမန်နေ့တွင် ကွာလာလမ်ပူမြို့ တနေရာ၌ ကျင်းပခဲ့ကြသည်။

ယင်းအခမ်းအနားသို့ မလေးရှားနိုင်ငံရှိ မွန်ဒုက္ခသည် ကယ်ဆယ်ရေးအသင်း၊ မွန်လူငယ်အသင်းနှင့် ကျောင်းသူကျောင်းသား ၂၀၀ ဦးခန့် တက်ရောက် ခဲ့ကြောင်း ပါဝင် လှုပ်ရှားခဲ့သူ နိုင်ဥက္ကာက ပြောသည်။

“အဓိက ရည်ရွယ်ချက်က မွန်အမျိုးသား အကျိုးအတွက် လုပ်ဆောင်ရင်း အကျဉ်းကျခံထားရတဲ့ မွန်နိုင်ငံရေး အကျဉ်းသားတွေ အကြောင်း ဒီကနေ့မွန်လူငယ် မောင်မယ်တွေ သိလာစေဖို့ပါ” ဟု မလေးရှား မွန်ကယ်ဆယ်ရေး အသင်းနှင့် မွန်လူငယ်အသင်း အထွေထွေအတွင်းရေးမှူး နိုင်ဥက္ကာက ပြောသည်။

အထူးသဖြင့် ယင်းအခမ်းအနားတွင် လက်ရှိမြန်မာ အကျဉ်းထောင် ကျခံနေရသူ နိုင်ယက္ခ၊ မင်းမျိုးသွေးနှင့် မွန်ရဟန်းပျို အရှင်ဥက္ကံသတို့၏ အထုပ္ပတ္တိများကို မွန်ကျောင်းသားကျောင်းသူများ ဖတ်ကြား တင်ပြခဲ့သည်ဟု သိရသည်။

နိုင်ယက္ခသည် အင်းစိန်ထောင်တွင်၎င်း၊ မင်းမျိုးသွေးသည် သာယာဝတီ ထောင်တွင်၎င်း  အကျဉ်းကျခံ နေရဆဲဖြစ်ပြီး ယခုအခမ်းအနား ကျင်းပသည့်နေ့သည် ၄င်းတို့၏ ၈ နှစ်ပြည့် အဖမ်းအဆီးခံရသည့် နေ့ ဖြစ်သည်။ ထို့အတူ မွန်ရဟန်းပျိူ အရှင်ဥက္ကံသ သည်လည်း NO 2010 လှုပ်ရှားမှုဖြင့် အင်းစိန်ထောင်မှ တဆင့် ပုသိမ်ထောင်သို့ ပြောင်းရွေ့အကျဉ်းကျခံ နေရဆဲဖြစ်သည်။

ဇူလိုင်လ ၁၇ ရက်၊ ၂၀၀၃ – ခုနှစ်တွင် မွန်ပြည်သစ်ပါတီ ခရိုင်ကော်မတီဝင် အဆင့်ရှိ မင်းနေဝင်း(ခေါ်) နိုင်ယက္ခနှင့် ဗိုလ်ကြီး မင်းမျိုးသွေးတို့ နှစ်ဦးအား ရန်ကုန်မြို့ တနေရာ၌ မြန်မာစစ်အစိုးရ ထောက်လှမ်းရေးတို့၏ အကွက်ဆင် ဖမ်းဆီးခြင်းကို ခံခဲ့ကြရပြီး ဗုံးခွဲရန် ကြံစည်သည်ဟု စွပ်စွဲကာ သေဒဏ်မှ နောက်ပိုင်းတွင် ထောင်ဒဏ် တစ်သက်သို့ ပြောင်းလဲ ချမှတ်ခံခဲ့ရသည်။

“နိုင်ယက္ခကိုတော့ မျိုးချစ်ပုဂ္ဂိုလ်တစ်ယောက် ဒီလိုပဲရိုးရိုးမြင်တယ်၊ လူငယ်တွေ ရဟန်းတွေကို မျိုးချစ်စိတ် ရှင်သန်အောင် နိုင်ငံရေး သဘောတရား နားလည်လာအောင် လုပ်ဆောင်တဲ့ နေရာမှာ စည်းရုံးရေး အားကောင်းတယ် ဒါကို သဘောကျတယ်” ဟု နိုင်ဥက္ကာ ဆက်ပြောသည်။

ထို့အတူ တိုးတက်သောမွန်လူငယ်အစည်းအရုံး MYPO မှလည်း ထိုင်းမြန်မာ နယ်စပ်တနေရာ၌ အလားတူ ဆွမ်းကျွေးပွဲ အခမ်းအနားတရပ် ယမန်နေ့တွင် ကျင်းပခဲ့သည်ဟု သိရသည်။

မင်းသုတ –
Copy from - monnews.org

0 comments: