Friday, June 24, 2011

ဒေါ်အောင်ဆန်းစုကြည် ဂုဏ်ထူးဆောင် ပါရဂူဘွဲ့ ချီးမြှင့်

University of Johannesburg
တောင်အာဖရိကနိုင်ငံရဲ့ နာမည်ကျော် ယိုဟန်းနက်စဘတ် တက္ကသိုလ် အဆောက်အဦ။
2011-06-24,

မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို တောင်အာဖရိကနိုင်ငံရဲ့ နာမည်ကျော် ယိုဟန်းနက်စဘတ် တက္ကသိုလ်က ဂုဏ်ထူးဆောင် ပါရဂူဘွဲ့ ပေးအပ် ချီးမြှင့်လိုက်တယ်လို့ တက္ကသိုလ်က မနေ့က သတင်းထုတ်ပြန် ပါတယ်။

ဒေါ်အောင်ဆန်းစုကြည်ဟာ ယိုဟန်းနက်စဘတ် တက္ကသိုလ်ရဲ့ ရပ်တည်ချက်တွေ ဖြစ်တဲ့ လူသား ဂုဏ်သိက္ခာနဲ့ မတူကွဲပြားမှု အပေါ် လေးစား တန်ဘိုးထားမှု၊ ပညာရေး လွတ်လပ်ခွင့်နဲ့ ပွင့်လင်း မြင်သာမှု အပေါ် အားပေးမှု တို့ကို ကိုယ်စားပြုသူ ဖြစ်တယ်လို့ တက္ကသိုလ်ရဲ့ လူမှု ဗေဒဌာနမှူး ပါမောက္ခ Rory Ryan က ပြောပါတယ်။

အခုလို ဒေါ်အောင်ဆန်းစုကြည်ကို တောင်အာဖရိကရဲ့ အထင်ကရ တက္ကသိုလ်ကြီး တခုက ဂုဏ်ထူးဆောင် ပါရဂူဘွဲ့တခု ထပ်မံချီးမြှင့်လိုက်တာဟာ တောင်အာဖရိက အစိုးရအနေနဲ့ မြန်မာနိုင်ငံ ဒီမိုကရေစီရေး အတွက် အပြည့်အ၀ ထောက်ခံ ရပ်တည်လာအောင် တွန်းအား ပေးလိုက်တာ ဖြစ်တယ်လို့ ယိုဟန်းနက်စဘတ်မြို့ အခြေစိုက် မြန်မာပြည် လွတ်မြောက်ရေး လှုပ်ရှားမှု (တောင်အာဖရိက) အဖွဲ့ရဲ့ ဥက္ကဌ ဒေါက်တာ သိန်းဝင်းက ပြောပါတယ်။


ဒီမိုကရေစီနဲ့ လွတ်လပ်မှုကို လိုလားတဲ့ ပညာရှင်တွေ အနေနဲ့ ကြည့်ရင် တောင်အာဖရိက အစိုးရရဲ့ ပြီးခဲ့တဲ့ ၂၀၀၇ ခုနှစ်လောက်က ကုလသမဂ္ဂ လုံခြုံရေး ကောင်စီမှာ မြန်မာ့အရေးကို ကန့်ကွက်ခဲ့တဲ့အပေါ် ပညာရှင်များ အပါအ၀င် ပြည်သူလူထုက မကျေနပ် ဖြစ်ခဲ့ကြကြောင်း၊ ဒေါ်အောင်ဆန်းစုကြည်ဟာ ဂုဏ်ပြုထိုက်တဲ့ ပုဂ္ဂိုလ် ဖြစ်တယ်ဆိုတာကို အစိုးရကို သိစေချင်ကြတဲ့အတွက် အစိုးရကို ဖိအားပေးတဲ့ သဘောလို့ ယူဆနိုင်ကြောင်း ဒေါက်တာ သိန်းဝင်းက ပြောပါတယ်။

နိုဘယ်လ်ငြိမ်းချမ်းရေးဆုရှင် ဒေါ်အောင်ဆန်းစုကြည်ကို တောင်အာဖရိကနိုင်ငံမှာရှိတဲ့ တက္ကသိုလ်ကြီးတွေက ဂုဏ်ထူးဆောင်ဘွဲ့ ချီးမြှင့်တာ အခုတကြိမ်နဲ့ ပါဆိုရင် (၃) ကြိမ်ရှိပြီ ဖြစ်ပြီး၊ ၁၉၉၇ ခုနှစ်က နက်တဲလ် (Natal) တက္ကသိုလ်၊ ၂၀၀၇ ခုနှစ်မှာ ကိတ်ပ်တောင်း(Cape Town) တက္ကသိုလ် နဲ့ အခု ၂၀၁၁ ခုနှစ်မှာ ယိုဟန်းနက် စဘတ် တက္ကသိုလ်တို့က ချီးမြှင့်လိုက်တာ ဖြစ်ပါတယ်။

Copy from - rfa.org/

0 comments: