Wednesday, June 1, 2011

နှစ်ရှည်ထောင်ဒဏ်ကျခံနေရသော သျှမ်းခေါင်းဆောင်များ ကျန်းမာရေးချို့တဲ့

သျှမ်းတိုင်းရင်းသားများ ဒီမိုကရေစီအဖွဲ့ချုပ်ဥက္ကဌ ခွန်ထွန်းဦး (အလယ်) ၊ အထွေထွေအတွင်းရေးမှူး စိုင်းညွန့်လွင် (ဘယ်) သျှမ်းပြည်တပ်မတော်မြောက်ပိုင်း၏ နာယက ဗိုလ်ချုပ်ဆေထဲင့် (ညာ)( ဓါတ်ပုံ- SHAN)
မေလ 31 ရက် 2011 ခုနှစ်။

နှစ်ရှည်ထောင်ဒဏ်ကျခံနေရသောသျှမ်းခေါင်း ဆောင် များ ယခုနှစ်အတွင်းကျန်းမာရေးချို့တဲ့ မှုများလာကြောင်း သျှမ်းတိုင်းရင်းသားများ ဒီမိုကရေစီအဖွဲ့ချုပ်က ပြောသည်။

၂၀၀၅ က ဖမ်းဆီးခံရသော SNLD ဥက္ကဌနှင့် အတွင်းရေးမှူး အပါအဝင် သျှမ်းပြည်မျိုးဆက်သစ် ခေါင်းဆောင် များအား ဝေးလံ ခေါင်သီသော နယ်စွန်နယ်ဖျားထောင်များသို့ပို့ဆောင်ခံရပြီး နောက်ပိုင်း တနှစ်ထက်တနှစ် ကျန်းမာရေး ဆိုးရွာလာကြခြင်းဖြစ် သည်ဟု သိရသည်။

“ကျောက်ဖြူထောင်ရောက် သျှမ်းပြည် မျိုးဆက်သစ် ခေါင်းဆောင် ဦးထွန်းညို ကလွဲရင် ခေါင်းဆောင်တွေ အားလုံး မှာ ကျန်းမာရေးချို့ တဲ့ကြတယ်။ စိုင်းမျိုးဝင်းထွန်းက စိတ်ရောဂါ စွဲကပ်နေတယ်။ ဥက္ကဌကြီး ဦးခွန်ထွန်းဦး၊ အတွင်းရေးမှူး စိုင်းညွန့်လွင်နဲ့ အလုပ်အမှု ဆောင်စိုင်းလှအောင် တို့ကတော့ စိတ်ဓါတ်အကြံ့ ခိုင်ဆုံးဘဲ” ဟု ပါတီပြောခွင့်ရ ဦးစိုင်းလိတ် ကပြောသည်။

သျှမ်းတိုင်းရင်းသားများ ဒီမိုကရေစီအဖွဲ့ချုပ်အလုပ် အမှုဆောင် စိုင်းလှအောင်

ကျောက်ဖြူ ထောင်ရောက် ဦးထွန်းညိုမှာ ညီမတူမများ ထောင်ဝင်စာ သွားတွေ့ရန် ခက်ခဲသည့်အပြင် မိသားစု အခက်အခဲကြောင့် ငွေကြေးများ မပို့ နိုင်သဖြင့် အဟာရ ချို့တဲ့မှုခံစားရပြီး သွေးအား နည်းနေသည် ဆိုပါသည်။

ပူတာအို အကျဉ်းထောင်ရောက် ထောင်ဒဏ် (၉၃) နှစ်ကျခံရသည့် ခွန်ထွန်းဦး (၆၈ နှစ်) တွင်မူစိတ်ဓါတ် ရေးရာ ကြံ့ခိုင်မှု၌ လေးစား ချီးကျူးဖွယ် ကောင်းကြောင်းလည်း ၎င်းကပြောသည်။

သျှမ်းပြည်မျိုးဆက်သစ် ဦးထွန်းညို

“သူ့မှာ ဆီးကျိတ်ရောင်၊ အစာအိမ်၊ နှလုံး၊ သွေးတိုး၊ အာရုံကြောအားနည်းပြီး နားအူရောဂါရှိတယ်။ မိုးရွာရင်၊ ရာသီဥတုအေးရင် တစ်ည အနည်းဆုံး ၁၀ ကြိမ်ဆီးသွားနေရတော့ အိပ်ရေးပျက်တယ်။ တစ်နေ့ဆေး ၄ ကြိမ် ပုံမှန် သောက်နေရတယ်။ ပူတာအိုဆေးရုံက အထွေအထွေရောဂါ ကုဆရာဝန် တလတခါဘဲ ဆေးလာ စစ်ဆေး ပေးတယ်” ဟုဆိုသည်။

ကျောက်ဖြူမြို့အကျဉ်းထောင်ရောက် ထောင်ဒဏ် (၇၉) နှစ်ရှိ SNLD အလုပ်အမှုဆောင် စိုင်းလှအောင် (၆၆ နှစ်) မှာမူ သွေးတိုး၊ ဆီးချို နှင့် ဦးခေါင်းအရေပြားယားယံသည့် ရောဂါရှိကြောင်း ဧပြီလကုန်က ထောင်ဝင် စာသွား ရောက်တွေ့ဆုံလာသည့် မိသားစု ဝင်ကပြော၏။ ဆေးပုံမှန်သောက်ရသဖြင့် ကျန်းမာရေးကောင်းမွန် သည်ဟုဆို၏။

ကလေးမြို့အကျဉ်းထောင်၌ ထောင်ဒဏ် (၈၅) နှစ်ကျခံရသည့် အမျိုးသား စာပေဆုရ SNLD အထွေထွေ အတွင်းရေးမှူး စိုင်းညွန့်လွင်မှာမူ သွား လုံးဝမရှိတော့ဘဲ အံကပ် တပ်ထားရသည့်အတွက် အိမ်မှပို့သည့် ခေါက်ဆွဲ၊ ဆန်ပြုတ် စသည့် ပျော့စာများသာ မှီဝဲနိုင်သည်ဟုဆို၏။ သွေးတိုး ရောဂါနှင့် လိပ်ခေါင်း သွေးယို ရောဂါအတွက် ထောင်ဆေးမှူးမှ တစ်လနှစ်ကြိမ် ကျန်းမာရေး ဆေးစစ်မှု ပြုလုပ်ပေးကြောင်း၊ အဆိုးဆုံးမှာ ၎င်း ဝါသနာပါသော စာရေးခွင့် လုံးဝမရှိသည့် ကိစ္စဖြစ်သည်ဟု ဦးစိုင်းလိတ်ကပြောသည်။

“ ကျနော်တို့ အထွေထွေအတွင်းရေးမှူး စိုင်းညွန့်လွင်မှာ လိပ်ခေါင်း ရောဂါလဲရှိတယ်။ ဒါပေမယ့်သူ့ ထက်ဆိုး တာ က ပခုက္ကူမြို့ အကျဉ်းထောင်က ထောင်ဒဏ် (၇၉) နှစ် ကျခံရတဲ့ စိုင်းညီညီမိုးပေါ့။ သူ့လိပ်ခေါင်းက တော် တော်ဆိုး နေ ပြီလို့ မကြာသေးခင်က ထောင်ဝင်စာ သွားတွေ့လာတဲ့ သူ့အမျိုး ကပြန်ပြောပြတယ်။ ထရခက် ထိုင်ရခက်တဲ့ အခြေ အနေပေါ့။ ဆေးထိုး ဆေးစားရင် စအိုဝအနာမှာ ခြောက်သယောင်ရှိပြီး မကြာမီ မှာဘဲ သွေးပြန် ထွက်လေ့ရှိတယ်။ အမှန်က သူအဖမ်းမခံ ရခင်ရက်ပိုင်း အလိုမှာ လိပ်ခေါင်း ခွဲစိတ်ကုသ ဖို့ ဆရာဝန်နဲ့ တောင်ချိန်းထားပြီ။ အဖမ်းခံလိုက် ရတော့ ခုချိန်ထိ မကုရသေးဘူး” ဟု ဆိုသည်။


သျှမ်းပြည်မျိုးဆက်သစ် စိုင်းမျိုးဝင်းထွန်း(အလယ်)

အကျဉ်းကျ သျှမ်းခေါင်းဆောင်များအနက် စိတ်ဓါတ် အကျဆုံးမှာ မြင်းခြံမြို့ အကျဉ်းထောင်၌ ထောင်ဒဏ် (၇၉) နှစ်ကျခံနေရသော စိုင်းမျိုးဝင်းထွန်း ဖြစ်ကြောင်း၊ အကျဉ်းသားများ ထိုးနှက်ခြင်း ခံရပြီး ယခုအခါ ထောင်ဆေးရုံ ရောက်နေသည်မှာ တတိယအကြိမ် ရှိပြီဖြစ်ကြောင်း သိရသည်။

“ ၂ နှစ်လောက်က စပြီး စိတ်ကျရောဂါ စွဲကပ်လာ။ ကယောင်ချောက်ခြား ဖြစ်ပြီး အစားအသောက် မဝင် ဘူး။ ညမအိပ်ဘူး။ ညမ အိပ်ဘဲ ထထအော်နေလို့ တခြား အကျဉ်းသားတွေနဲ့ ကတောက်ကဆ ဖြစ်ပြီး ထိုးကြကြိတ် ကြတယ်။ ထောင်ဆေးရုံ ပို့ပြီးကုသရင် တော့ သက်သာသယောင် ရှိတာပေါ့။ ဒါပေမယ့် ထောင်ထဲ ပြန်ရောက်ရင် ပြန် ပြန်ပြီး ဆိုးလာတယ်။ နာတာရှည် စိတ်ရောဂါ စွဲကပ် မှာကို စိုးရိမ် နေရတယ်” ဟုဦးစိုင်းလိတ်က ပြောသည်။

သျှမ်းပြည် တပ်မတော် ခေါင်းဆောင် ဗိုလ်ချုပ်ဆေထဲင့်မှာမူ မေ ၁၇ ရက် (မနက် ၁၁ နာရီခန့်မှ မွန်း လွဲ ၁ နာရီကျော် အထိ) က မိသားစုအား အသိပေး တိုင်ပင်ညှိနှိုင်းခြင်း မပြုဘဲ အာဏာပိုင်များက မျက်လုံးခွဲစိတ် ကုသ ပေးလိုက်ကြောင်း၊ စစ်တွေမြို့ သံဃာ့ဆေးရုံ၌ ၅ ရက်ကြာ ဆေးဝါးကုသခွင့် ရရှိပြီး မေ ၂၁ ရက် ဆေးရုံမှ ထောင်သို့  ပြန်လည် ပြောင်းရွှေ့ပေးလိုက်ကြောင်း၊ ဆေးဝါးကုသမှု ခံယူနေစဉ်အတွင်း မိသားစုနှင့် လုံးဝ တွေ့ဆုံ ခွင့်မပေးဘဲ၊ ဆေးရုံမှ ထောင်သို့ ပြောင်းရွှေ့ပြီး မေ ၂၂ ရက်ကျမှ ထောင်ဝင် စာတွေ့ခွင့် ရခဲ့ကြောင်း၊ အမြင် ကြည်လင်မှု ရှိလာပြိး ကျန်းမာရေးလည်း  ကောင်းမွန်လျက် ရှိကြောင်း မိသားစုဝင်က ပြန်လည် ပြောပြသည်။

၂၀၀၆ သံတွဲထောင်၌ သေဆုံးသွားသော သျှမ်းပြည်မျိုးဆက်သစ် ဆရာ ဦးမြင့်သန်း

သျှမ်းပြည် မျိုးဆက်သစ် ခေါင်းဆောင်များ ဦးဆောင် ကျင်းပသည့် ၂၀၀၅ ဖေဖေါ်ဝါရီ ၇ ရက် သျှမ်းပြည်မွေးနေ့ ညစာ စားပွဲအပြီး ဖေဖေါ်ဝါရီလ ၈ ရက်နှင့် ၉ ရက်နေ့များ၌ ဥက္ကဌ စဝ်ခွန်ထွန်းဦးနှင့် အတွင်းရေးမှူး ဦးစိုင်းညွန့်လွင် တို့အား ရန်ကုန်မြို့ နေအိမ်၌ နအဖ စစ်အုပ်စုက ဖမ်းဆီးထိန်း သိမ်းခဲ့ သည်။သျှမ်းပြည် အတိုင် ပင် ခံကောင်စီ ဖွဲ့စည်းမှု စွပ်စွဲ ချက်အပြင် အခြားအမှုပေါင်း များစွာ ရှာကြံ၍ ထောင်ဒဏ် ၉၃နှစ်စီရင်ချက်ချ ကာ ဥက္ကဌကြီးအား ရာသီဥတု ဆိုးဝါး လှသော ကချင်ပြည်ပူတာအို ထောင် သို့ ပို့ဆောင်ချုပ် နှောင်လိုက်သည်။ ပုဂ္ဂိုလ်ရေး ရာစီးပွါးရေး ပိုင်ဆိုင်မှုများကိုလည်း စစ်အစိုးရက သိမ်းယူ ချိတ်ပိတ် ခဲ့သည်။

ပြည်သူ့စစ် အဖြစ်အသွင်ပြောင်း လိုက်ပြီ ဖြစ်သော ဦးလွယ်မောင်း တို့၏ SSA အပစ်ရပ် တပ်ဖွဲ့ ခေါင်းဆောင် ဗိုလ်ချုပ် ဆေထဲန့်အား ထောင်ဒဏ် ၁၀၆ နှစ်၊ NLD အထွေအတွင်းရေးမှူး စိုင်းညွန့်လွင် ၈၅ နှစ်၊ ဗဟိုကော် မတီဝင် စိုင်းလှ အောင် ၇၉ နှစ်အပြင် ၂၀၀၆ မေလတွင် ရခိုင်ပြည်နယ် သံတွဲထောင်၌ အကျဉ်းကျနေစဉ် ကွယ်လွန်သွားသည့် သျှမ်း ပြည်မျိုးဆက်သစ် ခေါင်းဆောင် ဆရာဦး မြင့်သန်း၊ ဦးထွန်ညို၊ စိုင်းညီညီမိုး၊ စိုင်းမျိုးဝင်းထွန်းတို့အား ထောင်ဒဏ် ၇၉ နှစ်စီ အသီးသီး ပြစ်ဒဏ် စီရင်ကာ မြန်မာပြည် နယ်စွန်နယ်ဖျား ထောင် များသို့ ပို့ဆောင် အကျဉ်းချခဲ့သည်။

သတင်းရင်းမြစ် - သျှမ်းသံတော်ဆင့်သတင်း

0 comments: