Wednesday, March 16, 2011

မြင်ရတဲ့အန္တရာယ်နဲ့ မမြင်ရတဲ့အန္တရာယ်

ညူကလီယား ဆိုတဲ့အရာဟာ ဒီကနေ့ခေတ်မှာ လူသားတွေအတွက် အင်မတန် အသုံးဝင်သလို အင်မတန် လည်း အန္တရာယ်ကြီးပါတယ်။ ဘေးကင်း လုံခြုံစေဖို့ စနစ်တကျနဲ့ကိုင်တွယ် လုပ်ကိုင်နိုင်ရင် အကျိုးရှိပါ တယ်။ စီးပွားရေးမှာ ရင်းနှီးမြှုပ်နှံမှု လုပ်သလိုပေါ့။ စွန့်စားမှုများလေ အကျိုးအမြတ် များလေပေါ့၊ မူးယစ်ဆေး ရောင်းဝယ်တယ်ဆိုတာ တရားဥပဒေနဲ့ညိတဲ့လုပ်ရပ်ပါ။ ဒါပေမဲ့ အဖမ်းမခံရပဲ လွတ်သွားလို့ ကတော့ အမြတ်အစွန်း အင်မတန်ကြီးပါတယ်။ ဒီသဘောမျိုး ဖြစ်ပါတယ်။

အင်မတန် စနစ်ကျကျနဲ့ ဘေးကင်းလုံခြုံအောင် လုပ်ကိုင်ပေမဲ့ သဘာဝ ဘေးအန္တရာယ်ကြောင့်ပဲ ဖြစ်ဖြစ် လူရဲ့ အမှားအယွင်းကြောင့်ပဲ ဖြစ်ဖြစ် ဘေးသင့်တဲ့အခါမျိုးမှာ လူသားတွေအတွက် အင်မတန် ထိခိုက်စေပါ တယ်။ ညူကလီယား ယိုစိမ့်မှုတွေ ဖြစ်တဲ့အခါမျိုးမှာ အစိုးရတွေ ဒါမှမဟုတ် ကုမ္ပဏီတွေဟာ အစပထမမှာ သတင်း အချက်အလက်တွေကို အမှန်အတိုင်း ထုတ်ပြန်ပြောဆိုတာ၊ အချိန်မီ အသိပေး ထုတ်ပြန် တာတွေကို အပြည့်အ၀ လုပ်ဖို့ရာ ပျက်ကွက် တတ်ပါတယ်။

အိမ်တအိမ်မှာ မီးလောင်သလိုပေါ့ မီးလောင်ပြီဆိုတာနဲ့ လူအများ မသိအောင် ကြိတ်ပြီး မီးသတ်ကြတယ်။ ဘာဖြစ်လို့လဲဆိုတော့ ကိုယ့်အိမ်က စပြီးမီးလောင်တယ်ဆိုရင် အရေးယူ ခံရမှာဖြစ်လို့ပဲ။ ဒီတော့ ကြိတ်ပြီး သတ်ကြတယ်။ မနိုင်တော့တဲ့ အခါကျမှ မီး မီး ဆိုပြီး အော်ကြတယ်။ အဲဒီအခါကျတော့ တအိမ်လုံး မီးလောင်နေပြီ။

ဒီလိုပဲ TEPCO ဟာ ဓာတ်ပေါင်းဖိုတွေ မီးလောင်တယ်၊ ညူကလီယား ယိုစိမ့်နိုင်ခြေတွေကို အချိန်မီ အတိ အကျ ပြောဆို တာမျိုးတွေလုပ်ဖို့ ပျက်ကွက်ကောင်း ပျက်ကွက်နိုင်တယ်။ အပြစ်ပြောတာ မဟုတ်ပါဘူး။ လက်တွေ့ ဖြစ်ပျက်နိုင်တဲ့ အခြေအနေကို ထောက်ပြတာ ဖြစ်ပါတယ်။

ညူကလီယား လောင်စာတောင့်ဆိုတာ အပူချိန် အင်မတန်ပြင်းတဲ့ အရာဖြစ်တော့ ဓာတ်ပေါင်းဖိုထဲမှာ ရေခမ်းသွားတဲ့အခါ အပူလွန်ပြီး အငွေ့ထွက်၊ မီးလောင်တယ်ဆိုတာ ပုံမှန်ဖြစ်လေ့ ရှိတဲ့အရာပဲ။ အဲဒီလို ဖြစ်ပြီဆိုရင် ရေဒီယို သတ္တိကြွမှုတွေ လေထဲကို အနည်းနဲ့အများဆိုသလို ရောက်မှာပဲ၊ ရောက်ပြီဆိုရင် ဘယ် လောက်အတိုင်း အတာအထိ ဖြစ်နေပြီလဲ ဆိုတာကို သတင်းအချက်အလက် ဒေတာကို အချိန်မီနဲ့ အပြည့် အ၀ပေးနိုင်ဖို့ တာဝန်ရှိတယ်။

သဘာဝကြောင့်တဲ့အဖြစ်အပျက်မျိုးမှာ ဘယ်သူ့မှာမှ အပြစ်မရှိဘူး။ ပညာရှင်တွေဟာ နည်းပညာရပ် ဆိုင်ရာမှာ အစွမ်းကုန် ကြိုးစားကြမှာ အမှန်ပဲ။ မနိုင်တဲ့အခါ ထွက်ပေါ်လာတဲ့ အကျိုးရလဒ်ကို လူအများသိ အောင် အချိန်မီ သတင်းမပေးတဲ့အခါ၊ သတင်း ထိန်ချန်တဲ့အခါမှာ အပြစ်ရှိပါတယ်။ ဘယ်အကြောင်းအရာ ကို မဆို ကြိုတင်သိရင် နည်းလမ်းရှာပြီး ကာကွယ်မှုတွေကို လုပ်နိုင်သလောက် လုပ်လို့ရပါတယ်။

၁၉၈၆ ခုနှစ် ဧပြီ ၂၆ ရက်မှာ လူသိရှင်ကြားဖြစ်ခဲ့တဲ့ အရင်ဆိုဗီယက်ယူနီယံ အခုတော့ ယူကရိန်းပေါ့ Chernobly ညူကလီယား မတော်တဆမှုမှာ ကြိုတင်ကာကွယ်ရေး၊ ကယ်ဆယ်ရေးနဲ့ပတ်သက်ပြီး အားနည်းမှုတွေရှိခဲ့လို့ ပြည်သူတွေ ဒီကနေ့အထိ ဘေးသင့်ခဲ့ရတဲ့ ဒဏ်တွေကို ခံနေရတုန်းပဲ။ သင်ခန်းစာ ယူစရာတွေ အများကြီးရပါတယ်။

ကျနော့် အတွက်ကတော့ မြင်ရတဲ့အရာရဲ့ အန္တရာယ်ကို ကိုယ်တိုင် အစွမ်းရှိသလောက် ရှောင်တိမ်း ကာကွယ် တန်ပြန်နိုင်တယ်လို့ လက်ခံထားပါတယ်။ တယောက်တည်းလုပ်လို့မရတဲ့ အရာတွေလည်း ရှိပါတယ်။ ဒါပေမဲ့ မမြင်ရတဲ့ အရာတွေရဲ့ အန္တရာယ်ကျတော့ တယောက်တည်းနဲ့လုပ်လို့မရဘူး။ လူမှု အသိုင်းအ၀ိုင်း နဲ့ဝိုင်းဝန်း လုပ်ဆောင်မှ ရမယ်လို့ယူဆပါတယ်။

ညူကလီယားနဲ့ပတ်သက်တဲ့ အရာတွေကျတော့ တာဝန်ရှိသူတွေရဲ့သတင်းအချက်အလက်ကို အမှန်နဲ့ အချိန်မီပေးဖို့က အဓိကကျတယ်လို့ထင်တယ်။ ဒါမှကျွမ်းကျင်ပညာရှင်တွေရဲ့ လူထုကို ပညာပေးမှုတွေ ထိရောက်မယ်လို့ယူဆပါတယ်။

ကျော်ကျော်စိုး
၉း၀၈ နာရီ
မတ်လ ၁၆ ။ ၂၀၁၁ ခုနှစ်

0 comments: