Wednesday, December 15, 2010

တရုတ်ပြည် လုံကျဲန်းဆည်ကြောင့် ရွှေလီမြစ် တလျှောက်ရှိ ပြည်သူများဒုက္ခတွေ့

လုံကျဲန်းဆည် (“မြင့်တချီ ခန်းတလှည့်” အစီရင်ခံစာမှ)
14 December 2010

တရုတ်ပြည်မှ မြစ်ဖျားခံ၍ သျှမ်းပြည်အတွင်းဖြတ်သန်း စီးဆင်းသော ရွှေလီမြစ်ပေါ် လုံကျဲန်းဆည်ဆောက်လုပ်မှု ကြောင့် ရွှေလီမြစ်တလျှောက်ရှိ ပြည်သူများ ဒုက္ခ အခက်အခဲတွေ့နေရကြောင်း ထိုင်းနိုင်ငံအခြေစိုက် သျှမ်းသဘာဝ ပတ်ဝန်းကျင်SPEO အဖွဲ့ကပြောပါသည်။

“ရွှေလီမြစ် ပိတ်ပြီး တရုတ်က လုံကျဲန်း ဆည်ဆောက်လိုက်တော့ ရွှေလီမြစ်ကို အားထားပြီး စိုက်ပျိုး နေထိုင်ကြတဲ့ မူစယ်နဲ့ နမ့်ခမ်းပြည်သူတွေ မြစ်ရေ အတက်အကျ မမှန်လို့ အခက်တွေ့တာပေါ့” ဟု ထိုင်းနိုင်ငံ အခြေစိုက် သျှမ်းသဘာဝ ပတ်ဝန်းကျင်အဖွဲ့မှ ကိုစိုင်းစိုင်းက ပြောပါသည်။

မူစယ်နှင့် နမ့်ခမ်းမှ ဒေသခံ တစ်သောင်းကျော် ရွှေလီမြစ်ကို အားထား၍ စက်လှေများဖြင့် စုန်ဆန် ဖြတ်သန်းသွားလာ ရောင်းဝယ် နေကြကြောင်း၊ ရွှေလီမြစ်အတွင်း ရေအတက် အကျမမှန်ကန် သောကြောင့် စက်လှေ မောင်းရန် အခက်တွေ့ နေကြရကြောင်း ၎င်းက ဆက်လက်ပြောပါသည်။

“ရေကျနေတဲ့အချိန်ဆို စက်လှေမမောင်းနိုင်ဘူး။ တခါတလေ စက်လှေ မောင်းနေတဲ့အချိန် ရုတ်တရက် ရေကျသွား တော့ ဆက်မမောင်းနိုင်တော့ဘဲ သဲပြင်မှာ သောင်တင် နေတဲ့အခါမျိုးလဲရှိတယ်။ ရုတ်တရက် ရေပြန်တက်လာတော့ စက်လှေက ရေထဲမှာ တ၀ဲဝဲလည်နေတယ်။ ဒါကြောင့် ကူးသန်းရောင်းဝယ်ဖို့ အခက်အခဲ တွေ့တာပေါ့”

တရုတ်ဘက်မှ လုံကျဲန်း ဆည်ရေတံခါး ပိတ်လိုက်သောအခါ ဆည်အောက်ပိုင်း ရုတ်တရက် ရေကျဆင်းသွားပြီး ရေတံခါး ပြန်ဖွင့်လိုက်သော် ရုတ်တရက် ရေမြင့်တက် လာခြင်း ဖြစ်သည်ဟုဆို၏။

တရုတ်ပြည် တယ်ဟုန်(တိုက်ခုန်း) ကိုယ်ပိုင်အုပ်ချုပ်ရေး တိုင်းအတွင်းရှိ လုံကျဲန်းဆည် တည်ဆောက်မှု အကျိုးဆက်နှင့် ပတ်သက်၍ ဘန်ကောက်ရှိ ထိုင်းနိုင်ငံအခြေစိုက် နိုင်ငံခြား သတင်းထောက်များ အသင်း FCCT တွင် SPEO နှင့် သျှမ်းအမျိုးသမီးရေးရာ ဆက်သွယ်လှုပ်ရှား ဆောင်ရွက်ရေးအသင်း SWAN တို့က သတင်းစာ ရှင်းလင်းပွဲပြုလုပ်၍ အစီရင်ခံစာ ထုတ်ပြန်ခဲ့၏။


လုံကျဲန်းဆည်တည်နေရာပြမြေပုံ(“မြင့်တချီ ခန်းတလှည့်” အစီရင်ခံစာမှ)

တရုတ်ပြည်မှ လူမှုရေးအဖွဲ့အစည်းများက ထိုအစီရင်ခံစာကိုကိုင်စွဲပြီး ပြဿနာဖြေရှင်းရန် တရုတ်အာဏာပိုင်တို့ထံ တင်ပြတောင်းဆိုလိမ့်မည်ဟုမျှော်လင့်ကြောင်း ကိုစိုင်းစိုင်းက ဆက်လက်ပြောပါသည်။

လုံကျဲန်းဆည်သည် သျှမ်းပြည်-တရုတ်နယ်စပ်မြောက်ဘက် ၂၅ ကီလိုမီတာ(၁၅ မိုင်ကျော်)အကွာတွင် တည်ရှိသည်။ လုံကျဲန်းဆည်အောက်ပိုင်း သျှမ်းပြည်မြောက်ပိုင်းအတွင်း ရွှေလီရေအားလျှပ်စစ်စီမံကိန်း ရွှေလီ (၂) နှင့်ရွှေလီ (၃) ကို လည်း တရုတ်ကထပ်မံဆောက်လုပ်ဦးမည်ဖြစ်ကြောင်း သိရှိသည်။

နမ့်ခမ်းမြို့နယ် အမှတ် ၁ မန့်တတ် ရွှေလီရေအားလျှပ်စစ်စက်ရုံမှာမူ ပြီးခဲ့သည့် ဧပြီလဆန်းပိုင်းမှစ၍ ဖွင့်လှစ်အသုံးပြု ခဲ့သော်လည်း ဒေသခံပြည်သူများ အကျိုးခံစားခွင့်သိပ်မရှိလှဟုဆိုသည်။

သတင်းရင်းမြစ်_ (မွေခေါဝ်)သျှမ်းသံတော်ဆင့်

0 comments: