Thursday, September 9, 2010

မြန်မာရွေးကောက်ပွဲထောက်ခံဖို့ တရုတ်သမ္မတ ကတိပြု

တရုတ်နိုင်ငံမှာရောက်နေတဲ့ မြန်မာစစ်ကောင်စီခေါင်းဆောင် ဗိုလ်ချုပ်မှူးကြီးသန်းရွှေကို တရုတ်သမ္မတ ဟူကျင်းတောင်က ဗုဒ္ဓဟူးနေ့မှာ အခမ်းအနားနဲ့ကြိုဆိုခဲ့ပါတယ်။ မြန်မာစစ်ကောင်စီခေါင်းဆောင်ဟာ သူ့ခရီးစဉ်ရဲ့ ဒုတိယနေ့မှာ တရုတ်သမ္မတနဲ့ တွေ့ဆုံခဲ့တာဖြစ်ပါတယ်။


မြန်မာနိုင်ငံမှာ ရွေးကောက်ပွဲတွေကျင်းပဖို့ ပြင်ဆင်နေတဲ့အချိန်မှာ တရုတ်တို့အနေနဲ့ မြန်မာစစ်အစိုးရကို အခိုင်အမာထောက်ခံတဲ့ အကြောင်း တရုတ်သမ္မတကပြောပါတယ်။ ကျင်းပမယ့်ရွေးကောက်ပွဲတွေဟာ တရားမျှတမှုမရှိတဲ့ အတုအယောင် ရွေးကောက်ပွဲတွေပဲ ဖြစ်လိမ့်မယ်လို့ ဝေဖန်သူတွေက
 ပြောထားတာပါ။


တရုတ်-မြန်မာ နှစ်နိုင်ငံအကြား သံတမန်ဆက်ဆံရေး ထူထောင်ခဲ့တာ နှစ် ၆၀ ပြည့်ခဲ့ပြီဖြစ်ပြီး ဒီဆက်ဆံရေးကို ထိန်းသိမ်းသွားဖို့နဲ့ ပူးပေါင်းဆောင်ရွက်ရေးကို မြှင့်တင်ဖို့ ကြိုးပမ်းဆောင်ရွက်ချက်တွေကို တရုတ်သမ္မတနဲ့ မြန်မာစစ်ကောင်စီခေါင်းဆောင်တို့က ချီးကျူး ပြောဆိုခဲ့ကြပါတယ်။

နိုင်ငံတကာအခြေအနေတွေ ဘယ်လိုပဲပြောင်းပြောင်း မြန်မာနိုင်ငံနဲ့ပတ်သက်ပြီး တရုတ်တို့ရဲ့မူဝါဒကတော့ ပြောင်းလဲမှာမဟုတ်ဘူးလို့ မစ္စတာဟူက ပြောပါတယ်။

မြန်မာစစ်အစိုးရကို တရုတ်တို့က ထောက်ခံအားပေးတဲ့အပေါ် လူ့အခွင့်အရေးအဖွဲ့တွေက ဝေဖန်ပြောဆိုထားကြသလို ကျင်းပမယ့် ရွေးကောက်ပွဲတွေဟာ နောက်အစိုးရအဖွဲ့ထဲမှာ မြန်မာစစ်ဘက်က လွှမ်းမိုးချုပ်ကိုင်ထားဖို့ လုပ်တာဖြစ်တယ်လို့ ပြောကြပါတယ်။

မြန်မာစစ်အစိုးရက လူ့အခွင့်အရေးချိုးဖောက်တာ၊ နိုင်ငံရေးအတိုက်အခံတွေကို ဖိနှိပ်တာတွေကြောင့် အနောက်နိုင်ငံတွေက ဝေဖန် ပြစ်တင်ကြပါတယ်။

သဘာဝသယံဇာတပေါကြွယ်ဝတဲ့ မြန်မာနိုင်ငံမှာ တရုတ်တို့ရဲ့ စီးပွားရေး အကျိုးအမြတ်တွေရှိနေပါတယ်။

ပြီးခဲ့တဲ့ဇွန်လမှာ တရုတ်သမ္မတ ဟူကျင်းတောင် မြန်မာနိုင်ငံကို လာခဲ့ချိန်တုန်းက သဘာဝဓာတ်ငွေ့ပိုက်လိုင်း တည်ဆောက်ရေး စီမံကိန်း တခုအပါအ၀င် ကုန်သွယ်ရေးနဲ့ ကူးသန်းရောင်းဝယ်ရေးဆိုင်ရာ သဘောတူညီချက် အတော်များများကို နှစ်နိုင်ငံ လက်မှတ်ရေးထိုးခဲ့ကြ ပါတယ်။

မြန်မာနိုင်ငံဟာ တရုတ်တို့ရဲ့ မိတ်ဆွေ အိမ်နီးခြင်းနိုင်ငံဖြစ်တယ်လို့ တရုတ်နိုင်ငံခြားရေးဌာန ပြောရေးဆိုခွင့်ရှိသူ ကျန်ယုက အင်္ဂါနေ့မှာ ပြောခဲ့ပါတယ်။ ဒါ့အပြင် နိုဝင်ဘာလမှာကျင်းပမယ့် ရွေးကောက်ပွဲတွေဟာ မြန်မာ့ပြည်တွင်းရေးကိစ္စဖြစ်ပြီး မြန်မာ နိုင်ငံကို ဝေဖန်နေကြတဲ့ နိုင်ငံတွေအနေနဲ့ မြန်မာ့ပြည်တွင်းရေးမူဝါဒတွေပေါ်မှာ၊ သူ့အဆိုအားဖြင့်၊ အနုတ်လက္ခဏာဆောင်တဲ့ သက်ရောက်မှုမျိုးတွေမဖြစ်အောင် ရှောင်ရှားလိမ့်မယ်လို့ တရုတ်တို့ကမျှော်လင့်တယ်ဆိုပြီး ပြောခဲ့ပါတယ်။

ဗိုလ်ချုပ်မှူးကြီးသန်းရွှေနဲ့အဖွဲ့ဟာ ၂၀၁၀ ပြည့်နှစ်၊ ရှန်ဟဲ နိုင်ငံတကာကုန်စည်ပြပွဲနဲ့ တရုတ်နိုင်ငံတောင်ပိုင်း၊ ဂွမ်ဒေါင်းပြည်နယ်က ရှန်ဇန်း စီးပွားရေးဇုံဆီ သွားဖို့ရှိပြီး စနေနေ့မှာ တရုတ်နိုင်ငံကနေ ပြန်မှာဖြစ်ပါတယ်။

By ဗွီအိုအေ (မြန်မာဌာန)

0 comments: